Shillong, Naiwieng 05: Palat 350 ngut tam ki nongkyrshan bad ki nongialam bahakhmat jong ka BJP North Shillong Constituency hynne ka sngi, kila leit ban pyniasoh noh bad ka seng NPP ha ka jingialang kaba long ha Dorbar Hall Lawmali, Shillong.
U kyrtong ka NPP na North Shillong Constituency Bah Ransom Sutnga ryngkat ka jingiadonlang u President ka NPP Shillong City u Bah Lamphang Kharmujai bad ki nongialam ka seng, kila pdiang sngewbha ia ki 20 ngut ki nongialam ka BJP North Shillong Mandal ryngkat bad palat 350 ngut ki nongkyrshan jong ka BJP.
Haba kren haka jingialang u Bah Ransom ula pynpaw iaka jingkmen bad ula ai khublei ia kine baroh kiba la wan ban pyniasoh bad ka NPP khamtam ha kaban ai jingkyrshan ia u kum u kyrtong ka seng ban iakhun iaka elekshon MLA 2023.
Ula ong ka thong ka jongu ban iakhun iaka elekshon kadei ka jingsuk bad ban pynneh iaka shongsuk shongsain bad ban shimkhia iaka jingeh u duk u suk.
U Bah Ransom ula pynbna ruh ba ha kine ki sngi ban wan, 100 ngut tam ki nongialam bad nongkyrshan ka TMC kin wan ban pyniasoh noh bad ka NPP.
Ia kane ka kynhun ki Nongialam bad nongkyrshan ka BJP la lamkmat da u Bah Alwyn Lyngdoh Nongbri uba la ong ba hadien ba u Bah Martamlin Pyrbot ula mih noh na ka BJP, ka kynhun kala rai ban mih noh na ka BJP bad kila iehnoh kam baroh ha u Nailur 2022 bad kila shim iaka rai ban pyniasoh noh bad ka NPP.
U Bah Alwyn ula iathuh baroh shi katta, ula bat kum u President ka BJP North Shillong Mandal hynrei ula resain noh ryngkat bad ki nongialam kiba hakhmat hadien ba kim don mon ban kyrshasxn ia u Bah MH Kharkrang ne ia u Bah Micheal Kharsyntiew kiba pan ticket na ka BJP ban iakhun iaka elekshon.
Kane ka jingwan pyniasoh kine ki nongialam bad nongkyrshan ka BJP kala nang pynkhlain iaka seng NPP ha North Shillong.
