Shillong, Naiwieng 04 : U Myntri ka Tnad Revenue & Disaster Management ma Kyrmen Shylla hynne ka sngi thohdieng, ula buh ia u mawnongrim ban shna noh ia ka surok Rymbai-Borghat-Jalalpur (RBBJ) ha ka jingialang bala pynlong ha shnong Bataw, ha ka jingiadonlang u MLA barim ma Justine Dkhar, ki MDC ka JHADC bad ki Rangbah Shnong.
Kane ka project bala ai kyrteng Rehabilitation of Damage Pavement kynthup ka MBT jong ka RBBJ ka dei kaba la mang haduh T. 23 klur bad kan kynthup ia ka jingsiang rong ia ka surok naduh ka 8 km sha ka 37 km jong ka lynter kane ka surok bad ka project ka dei kaba jrong haduh 30 km.
U Bah BW Phira, SE ka Tnad PWD (Roads), Jowai Circle ula pyntip ba ia kane ka project la mang tyngka ha ka 8 tarik u Nailar 2022 hapoh ka skhim RIDF bad ki kam ban pyntrei ki kynthup ia ka jingsiang surok rong, ki nala, ki kynroh, ki signboard bad kiwei kiwei bad ka jingiar jong ka surok kan long 3.75 m.
U Ma Kyrmen Shylla ula ong ba ki MLA barim kila mad ia shibun ki jingeh ha kine ki 50 snem bala leit noh hynrei watla katta, kila wanrah ia ki kam pynroi sha ka thain bad donkam ban burom bha ia ki.
U la banjur ba ka jingiatylli ka long kaba kongsan haba ong “lyngba ka jingiatylli ngin lah ban wanrah ia ka jingkylla kaba ngi kwah”.
U Myntri ula pyntip ruh ba ka jingpyntrei ia ka Synrang Umlawe WWW kaba hap hapoh ka JJM kala iaid shaid shaid bad hadien ba pyndep ia kane ka project, ki paidbah kin sa ioh shibun ki jingmyntoi na kylleng ki shnong ba marjan ka Bataw.
Kiwei pat kiba la ai jingkren ki kynthup ia u ma Hosting Pajat, Secretary ka Bataw, u ma Lomris Lyngdoh MDC, ma Finelyness Bareh Dy. CEM ka JHADC, ma Lasky Rymbai bad kiwei kiwei.
