Itanagar, Naiwieng 04: Ka tnat Central Bureau of Investigation (CBI) hynnin ka sngi Palei kala pynlong ka jingkhynra ha ki 16 tylli ki jaka bapher bapher ha Arunachal Pradesh, West Bengal bad Uttar Pradesh, kata ha ka jingtohkit kaba dang iai bteng ha kaba iadei bad ka jingkynnoh lait tuh ki jingkylli ha kaba pynlong ia ka eksam na ka bynta ka post engineering.
Na ka liang ka sorkar Arunachal Pradesh ha u taiew ba la dep kala weng bad sospon noh ia ki sawngut ki dkhot ka Arunachal Pradesh Public Service Commission (APPSC), ar bnai hadien ka jinglaittuh ka jingkylli na ka bynta ka eksam pynrung kam.
Haduh mynta kila don 10 ngut ki briew kaba kynthup ia u deputy secretary-cum-deputy controller of examination ka APPSC kiba la shah kem noh ha ki bor pulit ka jylla halor ka jingkynnoh donkti ha kaba iadei bad ka jinglaittuh ki jingkylli.
Ka APPSC kala pynlong ia ka eksam na ka bynta ka post Assistant Engineer (civil) ha ka 26 – 27 tarik u Nailar ba la dep.Ka tyllong khubor kala ong ba ki heh ka CBI ha ka por ba kila pynlong ka jingkhynra kila ioh ban kurup ia shibun bah ki kot ki sla bad ki jingthoh kaba kynthup ia ki stamp kiba la shu shna thok jong u executive magistrate ka Arunachal Pradesh, Executive Engineer, State Bank of India, ki Hard discs, pen drive nalor kiwei pat.
Halor kane ka jingjia la rejistar case ruh pyrshah ia u Akhilesh Yadav, Jeju Institute, Itanagar, Papum Pare City, Arunachal Pradesh bad ia kiwei pat ki heh jong ka APPSC.
Hadien ka jingbthah jong u Myntri Rangbah (CM) ka jylla u Pema Khandu, na ka liang ka sorkar jylla dang shen kala aiti ia kane ka jingtohkit sha ka CBI, kaba la rejistar case bad ba ka kynhun na kane ka tnat tohkit ba la khlieh da u joint director kila wan jurip sha Itanagar ha une u taiew ba la dep.
Na ka liang u CM Khandu ula ong ba ka sorkar jylla ka kut jingmut na ka bynta ban pynkhuid lut ia ki jaboh jabain kiba don hapoh ka tnat APPSC na ka bynta ka bha ka miat jong ki nongshong shnong ka jylla hi baroh kawei.
Na ka liang u Chairman jong ka APPSC, u Nipo Nabam ula iehnoh kam ha ka 14 tarik u bnai Risaw ba la dep shibynta ban shim ka jingkitkhlieh halor ki jingleh bakla da ki ophisar jong ka commission kiba dei khmih halor ka jingtreikam kiba buhrieh bad ki ban khanglad ia ka jinglaittuh ki jingkylli.
Kiba bun ki kynhun seng kaba kynthup ia ka Anti-Corruption Foundation kila dawa na ka bynta ban sospon ia u Chairman ka APPSC, u Secretary lem bad kiwei pat ki heh sorkar halor kane ka jinglaittuh ki jingkylli.Nalor kata kila dawa ruh ban pynlong ka jingtohkit kaba laitluid ha kaba iadei bad kane ka jingjia.
Lah ban kdew ba ha ka 28 tarik u bnai Nailar ba ladep uwei u nongiakhun ia katei ka eksam ula ujor da ka FIR hapoh Itanagar police station ha kaba iadei bad ka jinglaittuh ki jingkylli jong ka APPSC.
