Ki helicopter jong ki shipai Air Force na Guwahati air station kila kit ia ki mar bam na Shillong Air Force Station, kim shym la lah ban leit pynpoi ia ki marbam sha ka jaka ba dei ban pynpoi ha South Garo Hills namar ka jingbym ailad ka mariang.
“Hynrei ki helicopter kila ioh ban jam sha ka thain Maheskola hynrei namar ka jingrben u lyoh bad jingjur u slap ha ka por mynstep, kala pynbor ia kine ki helicopter ban phai noh sha ka jaka ba shngain” pyntip ki bor pyniaid na South Garo Hills District.
Ki shipai Air Force kila hiar biang hynne ka step sha ka thain hynrei ym pat shym la ioh jingtip la ki helicopter ki la lah ne em ban rung bad leit hiar sha ki jaka ba dei ban hiar.
U Myntri Rangbah ka Jylla Conrad K Sangma uba la plan ban leit sha South Garo Hills na Shillong Air Station ban iakynduh ia ki briew ba shah ktah bad peit ia ka jingiaid ki lad jingiarap, ula sahkut lang namar ka jingbym ailad ka mariang hynne ka step ha Nongbah Shillong. Namar kane, ula hiar kyrkieh noh da ka Kali sha Guwahati bad leit sha ka thain Ri-lum Garo.
Ki helicopter ba kit ia ki marbam ki don jingthmu ban pynhap ia kine ki marbam ha Mahadeo, Kanai, Bonbera, Rongsu Agal, bad Kalu Songmong. Ki helicopter ki dei ruh ban hiar ha kawei ka madan ha Siju bad Maheskola ban aiti ia ki marbam bad kiwei kiwei ki tiar ba donkam sha ki bor Shnong ba kin sam ia ki paidbah.
Ki marbam ba dei ban leit pynhap ki kynthup ia u khaw, u dai, ka mluh, ka shini, ka umphniang bam, ka umdih, ki tarpaulin bad ki blanket.
Palat 300 tylli ki longing kila sahkut ha ka thain Siju-Maheskola -Mahadeo kiba la dkut na ka jingpyniasoh bad ka Jylla na ka daw ka jingtwa khyndew naduh ka 17 tarik Jylliew. Ki surok ba pyniasoh ia ka thain lyngba ka Rongara bad Ranikor ha South West Khasi Hills kila shah kah lynti ba ka jingtwa khyndew.
Ki bor sorkar kila ioh tam mynta ia ka met jong ki hynriew ngut ki briew kiba jah rngai na ka jingtwa khyndew katba ka jingiawad ia ki arngut ki nongbylla ka dang iai bteng ha ka thain Nangalbibra.
