Shillong, Risaw 12: U Member of Parliament (MP) ka Rajya Sabha napoh ka jylla Bihar u Rakesh Sinha hynne ka sngi ula thoh sha u Myntri Rangbah ka Jylla u Conrad K Sangma ban pynioh surok noh naduh ka shnong Kongthong shaduh Sder.
Haka shithi u Rakesh Sinha ula pynkynmaw ba kine ki shnong ba don marjan bad ka shnong Kongthong kidei ki bym pat don surok watla naka liang u Myntri Rangbah Duh ka ri India u Narendra Modi ula ju kren halor ka jingitynnad ka shnong Kongthong bad ki shnong ba don marjan.
U Rakesh ula pynpaw ba dang shen ula shimti iaki shnong ba kynthup Sder, Mawmang bad ka Mawsohmad naka bynta ban kyntiew iaka roi ka par hynrei kine ki shnong haduh mynta ki pat don surok ka ba buh jingeh iaki paidbah jong kane ka thain.
Ula ong ba ka shnong shnong Kongthong kala shah kynthup hapoh ka Saansad Gram Adarsh Yojana kum shi bynta ban kyntiew iaka roi ka par bad ban pynneh iaka jinglong tynrai bad kyrpang ka shnong bad ki nong shong shnong.
U Rakesh Sinha ula pynpaw ba haduh mynta kine ki shnong kim pat don surok bad ki nongshongshnong ki hap ban iaid palat 2 kynta tam ban poi sha ka shnong ba don surok.
Ula iathuh ba kala don ka jing sorjamin ia ki jaka ban shna surok naduh Kongthong haduh Sder hynrei haduh mynta ka jingshna surok kam pat sdang satia.
Halor kane une u MP ka Rajya Sabha na Bihar ula kyntu ia u Myntri Rangbah ka jylla u Conrad K Sangma ban sdang noh ka jingpyntrei surok na Kongthong sha Sder naka bynta ka jingmyntoi ki paidbah ka thain.
