Tura, K’lyngkot 18 : Ka kynhun ialehkai ki thei U-18 ka Ri-Bhoi District, kala jam mynta sha ka phainal da ka jingjop suk ba 5-1 kol pyrshah ia ka Eastern West Khasi Hills, ha ka jingiakhun semi phainal ba nyngkong jong ka U-18 Girls Football Division ka 5th Meghalaya Games ba long ha PA Stadium, Tura hynne ka sngi Palei.
Haba pyni ia ka jingkhlain naduh ba sawa ka jingput, kam shym la shimpor ia ki thei ialehkai ka Ri-Bhoi ban ioh pynkhih ia ka jar lyngba ka kol jong ka samla Rimika Khongkai, kaba la thep ha ka minit ba 3 jong ka kylla step.
Ban pynjem khnap shuh shuh, ki thei ialehkai ka Ri-Bhoi kila ioh ban thep biang sa shi kol ha ka minit ba 26 lyngba ka samla Imaia Shylla.
Ka kynhun ialehkai ka Eastern West Khasi Hills kala iakhun dohiap mar syn shah thep 2 kol bad dei ha ka minit ba 31 ba ka samla Rympeibasuk Syiemlieh, kala ioh ban pynkhih ia ka jar, kaba la pyntam ia ka Ri-Bhoi da 2-1 kol.
Ka jingiakhun jong ka kylla miet kala sakhi ia ka jingpyni sap ba khlain jong ki thei ialehkai ka Ri-Bhoi, kaba lam sha ka jing ioh thep biang ia ka kol ha ka minit ba 41 lyngba ka samla Imaia Shylla. Ki khmat baroh kila phai sha ka samla Imaia kaba iakhun ban ioh thep hattrick bad kane kala urlong shisha ha ka minit ba 49.
Ka Eastern West Khasi Hills kala ioh ia ka lad hangne hangtai hynrei namar ka jingbym don ka jingshaniah halade, kala pynkut lad ia ka jingioh pynphai kol.
Ka Ri-Bhoi kala pyni ia ka jingkhlain ha ka rukom ialehkai bad ym slem hadien ba ioh thep ia ka kol hattrick, ka samla Imaia kala ioh ban khyrwit biang sa shikol ha ka minit kaba 57 bad pynkut synson ia ka Eastern West Khasi Hills.
Hynrei hashuwa ban kut ka jingiakhun, ka samla Imaia kala shah brut bad la hap ban pynkit noh ia ka shabar jong ka madan. Kane ka samla kala don ha ka jingartatien ban ioh ialehkai ia ka phainal ka ban long la shi Thohdieng pyrshah ia ka kynhun ka ban jop ia ka semi phainal kaba ar.
Hynrei ka phutbol ka dei ka jingialehkai ba bym nang ban batai bad ka kynhun ialehkai ka Ri-Bhoi kan khmih lynti ia ki kam phylla khnang ba kane ka thei ialehkai No.7 kan lah ban ialehkai ha ka phainal ban knieh ia ka takma ksiar.
