Shillong, K’Lyngkot 18: Ka Sorkar Meghalaya kala ot ribbon ia u snem 2024 da kaba sdang iaka iew janmiet ha Nan Polok Shillong bad kane ka iew kan plie naduh ka por 5 baje janmiet haduh 9 baje haka sngi Nyngkong haduh sngi Saitjain, naduh 19 tarik mynta u bnai haduh 31 tarik u Lber.
Kane ka Project ka dei ka sienjam bala shim daka Meghalaya Tourism Department bad la pyntreikam daka Meghalayan Age Ltd.
Ki nongwan iew ki lah ban iakynduh bad ialap khana bad ki nongwan die iaki mar mata ha kine ki bnai ban iaid ka iew miet ha Nan Polok.
Nalor ka iew janmiet, kan don ruh ka jingpyninam iaki tiar ba shna hi, kan don ruh ka Art bad Photography Exhibition ban pyninam iaka sap ki paidbah ka Jylla.
Kan don ruh ki jaka ban die iaki marbam bad mar dih tynrai kiba la pynkhreh khlem da khlem dawai (Organic) bad ki jaka ban die iaki ashar, ki musla nalor ki tiar ba shna daki siej bad kiwei kiwei de.
Ka Meghalaya Grassroots Music Project (MGMP) kan plie lad iaki samla ka Jylla ban pyninam iaka sap ba ki don haka put ka tem bad rwai ban pynjah thait iaki nongwan iew.
Ki Stall bad kiwei ki jait pyninam ki dei naka bynta ban pynitynnad iaki nongwan kai katba ka iew janmiet kan dei naka bynta ban pyninam iaki mar mata ki nong shong shnong ka Jylla kum ka jingkyrshan iaki nongrep, ki nong sengkam lajong, ki nong shna jingshna bad ki nongrwai.
Ka thong jong ka iew kadei ban ailad iaki paidbah bad iaki nongwan shangkai suwari ban pynjahthait ialade daka ba wan shang pyngnad ha ka iew janmiet ha Nan Polok.
Ka iew janmiet kan plie ia baroh bad ka bai rung ka long T.100 marwei daka ba rung na Gates 2 and 3 bad ym donkam siew iaki khynnah ba hapoh 10 snem bad kan don ruh ka jaka lehkai ki khynnah.
Ka jingioh nong kaba man ka taiew yn synniang shaki kynhun bad ki Institution kiba trei naka bynta ka bha ka miat u paidbah.
