Shillong, Lber 25: U Myntri Rangbah ka jylla u Conrad K Sangma ula ong ba ka jingpynlong ia ki jingialehkai Football ha ka kyrdan International bad kumjuh ka jingshimkhia ban pynbiang ia ki jingdonkam ha ki madan, kan kyntiew bha ia ka jingialehkai football ha ka jylla.
U Conrad Sangma ula kren ia kane, hadien ka jingwan peitkai ia ka jingialehkai Football hapdeng ka ri India bad Bangladesh ha ka 2027 AFC Asian Cup Qualifier kaba la long ha JN Stadium Shillong hynne ka sngi Baar.
Haba kylli la ki jingialehkai ha ka kyrdan International kan ai mysniem ia ki nongialehkai ka Jylla ba kin pyntbit ialade ha ka jingialehkai Football, u Myntri Rangabh ula ong, “Kadei ka rukom thaw ia ka jinglong jingman bad ngi lah don ruh ia ki prokram bapher bapher kum ka Chief Minister Grassroots Football Mission. Ngi la shna ia ki madan ialehkai Artificial Turf ha kylleng jong ka jylla bad ngi lah pynlong ruh ia ki jingiakob ialeh phutbok ia ki shnong ki thaw. Ka rukom treikam ka long kaba biang bha bad ka jingdon sa ia ki jingialehkai ha ka kyrdan International, nga don ia ka jingngeit kaba skhem ba lada kum kine ki jingaikhun ki dang iai bteng ban long, kin ai mynsiem ia ki khynnah ki jong ngi bad kan kyntiew ruh ia ka jinglong jingman ha ka rukom ialehkai football baroh kawei”.
Kumban shu pynkynmaw dang ha ka taiew kaba la dep, ka Shillong ka la pynlong ia ka FIFA Football Friendly hapdeng ka India pyrshah ia ka Maldives ha JN Stadium Polo bad ha kane ka jingiakhun ka India kala pynrem da 3-0 ia ka Maldives bad kane ka dei ruh ka jingiakhun kaba nyngkong haka International Level ban ialehkai hapoh Shillong bad ka long ruh ka sien kaba nyngkong eh ba ka kynhun ialehkai ka ri India kan iakhun hapoh nongbah Shillong
