Shillong, Jun 1: Ka Selsella Sports Association kala bteng iaka jingjop ka jongka haka Meghalaya State League 2023 da kaba pynrem 8-3 kol iaka Atong Matgrik ha ka Group D kaba la long ha Chandmari Ground, Tura hynne ka sngi.
U Saldih Momin ula ioh iaka Hat Trick bad thep ia ka kol ha ka minit kaba 31′, 33′, bad 45’+2 bad ula pynai ruh iaka bol ha u Walseng Sangma uba la ioh thep ia ka kol kaba nyngkong na ka bynta ka Selsella haka minit kaba 4.
Kiwei pat ki rangialehkai ka Selsella kiba la ioh thep kol ki kynthup ia u Ramseng Sangma ha ka 22 minit, u Tengsu Sangma ha ka 82 minit bad u Sillingston Sangma ha ka minit kaba 85 bad 90.
Ka Atong Matgrik kala ioh ban pynsngewtynand iaki nongkyrshan ki jongka da kaba ioh thep3 tylli ki kol kata lyngba u Walsrang Ch Sangma ha ka minit kaba 35 bad 80 bad Silash G Momin ula thep ia ka kol ha ka 48 minit.
Haba phai sha ka jingiakhun ha Kiang Nangbah Jowai jong ka Group B, ka Mulait United kala pynliem da 6-1 kol ia ka Rymbai Iawpynsing.
U Jas Chyrmang ula ioh ia ka Hat Trick da kaba thep iaka kol ha ka 9, 49 bad 66 minit, katba u Romarius Laban ula thep ha ka minit kaba 63 bad 64 bad u Lency Swer ula thep iaka kol ha ka minit kaba 31.
U Rimitre Lyngdoh ula thep ia ka kol ha ka minit kaba 55 na ka bynta ka Rymbai.
Ha ka jingiakhun ha ka Group A ha Shillong hapdeng ka Umkseh bad Umrit kane ka jingiakhun kala kut haka jingiakhaid da 2-2 kol.
U Daraplang Thangkhiew ula thep iaka kol ha ka minit kaba 34 na ka bynta ka Umrit katba ka Umkseh kala ioh ban pyniakhiad haka minit kaba 60 lyngba ka kol kaba la thep da u Rilangstar Umdor.
U Modesterson Matlai ula ioh thep ia ka kol na ka bynta ka Umrit ha ka minit kaba 80 bad ka Umkseh kal iakhun tyngeh biang ban ioh ban pyniakhiad bad dei ha ka minit kaba 86 ba u Rangkitbok Rani ula ioh ban thep ia ka kol.
Ha ka Group A ha Shillong ka jingiakhun ha ka nsgi Thohdieng kan long hapdeng ka Mawlai pyrshah iaka Seng Samla Laitryngew ha ka por 3 baje mynsngi.
Ha ka Group B ha Jowai, ka Niaw Wasa United kan iakhun pyrshah iaka Sein Pynbhalang ha ka por 2:30 mynsngi.
Ha ka Group C ha Mawkyrwat, ka Pyndengrei kan iakhun ia ka Riangdo ha ka por 3 baje mynsngi bad ha ka Group D ha Tura, ka Warima kan iakhun pyrshah iaka Khliehmawlieh Youth Club haka por 3 baje mynsngi.
