Shillong, Naitung 30 : Ka sorkar jylla ka la dep ban pyllait haduh 122 klur tyngka ka song pisa sha ki distrik bapher bapher na ka bynta ban pyllait noh ia ka tulop kaba sahteng haduh saw bnai kaba dei jong ki nonghikai SSA hapoh ka jylla.
Haba kren sha ki lad pathai khubor, u Symbud Myntri Rangbah, Bah Prestone Tynsong u la iathuh ba ia katei ka song pisa ki la dep ban pyllait ha ka 27tarik mynta u bnai bad mynta ki dang ap biang ia ka song pisa na ka sorkar pdeng na ka bynta ban siew pyndep pat sa ia ka tulop kaba sahteng sa shibnai.
La iathuh ruh ba dang shen ka sorkar jylla ka la leit ruh ban kynduh ia ka Myntri jong ka tnad pla tyngka jong ka sorkar pdeng bad kumjuh ia ki ophisar jong katei ka tnad na ka bynta ban kyrpad ban phah pyllait noh ia katei ka song pisa.
Shuh shuh u la ong ruh ba u Myntri Rangbah ka jylla, Conrad K Sangma markhmat u la dep ban kren markhmat bad ka myntri ka sorkar pdeng halor ka jingpynslem ban pyllait ia ka song pisa kaba iadei bad ki nonghikai SSA.
