Shillong, Naiwieng 02 : U Myntri ka Jal Shakti, Gajendra Singh Shekhawat un sa wan sha Jylla ha ka 3 tarik bad 4 tarik mynta u bnai ban iashimbynta ha ka jingialang jong ka North East Space Application Centre (NESAC) kaba don ha Umiam.
Kane ka jingialang ka dei kaban iakren halor ka jingpyndonkam ia ka Space Application ha kaban tehlakam ia ka jingshlei um hapoh ka thain Shatei Lam Mihngi ka Ri.
U Myntri un sa iashimbynta ruh ha ka jingialang bishar kam bad ki Tnad ka Sorkar Pdeng bad Sorkar Jylla haba iadei bad ki prokram ka Jal Shakti ba kynthup ia ka JJM, PMKSY bad kiwei kiwei nalor ka Springshed Development ha Meghalaya.
Nalor kane, un sa leit ban jngoh ruh ia ki project JJM ha Nongpoh Ri-Bhoi District ban sa pynbud da ka jingialang bishar kam bad ki Ophisar ka District halor ka Aspirational District.
