Shillong, Naiwieng 23: U Myntri Khynnah ka Sorkar Pdeng uba khmih ia ka Tnad Micro, Small and Medium Enterprises, u Bhanu Pratap Singh Verma yn wan iashim bynta ha ka Viksit Bharat SankalpYatra (VBSY) kaban long ha ka 24 bad 25 tarik u Naiwieng, 2023 ha jylla Meghalaya.
U Bhanu Pratap Singh Verma yn poi lashai ka sngi Thohdieng ban iashimbynta ha ka prokram VBSY kaban long ha ka shnong Tynring kaba hap hapoh ka East Khasi Hills District bad ha ka sngi Saitjain, u Myntri yn leit ban iashimbynta ha kawei ka prokram VBSY kaban long ha ka shnong Laitkseh.
Ka Viksit Bharat Sankalp Yatra kadei ka sienjam ha kylleng ka ri ban ai jingtip bad pynkupbor ia ki briew jong ka ri shaphang ki skhim ba kongsan jong ka Sorkar bad kane ka Yatra kadei kaba dang pyntreikam mynta ha saw tylli ki distrik ka Meghalaya ha ka bynta kaba nyngkong.
Ia kane ka Yatra la plié paidbah da u Myntri Rangbah Duh, u Narendra Modi ha ka 15 tarik u Naiwieng, 2023 ha Khunti, Jharkhand, ha kaba la pyllait paidbah shibun tylli ki kali na ki jaka bapher bapher ba don bun ki riewlum bad kiba la poi sha palat 1 lak ngut ki briew bad 259 tylli ki Gram Panchayat ha ka sngi kaba nyngkong.
Ka thong jong ka Yatra ka dei ban ai jingtip shaphang ki skhim ba kongsan jong ka Sorkar bad ban pynurlong ia ka jingpyntreikam pura ia kine ki skhim bad kane ka sienjam ka pynshlur ia ki paidbah ba kin iashimbynta ha ka roi ka par jong ka ri.
