Shillong, Nohprah 03: Ka kynhun rwai kaba pawnam ha ka pyrthei ka ‘Blue’ kan wan ban pynshongshit ia ki paidbah ka Nongbah Shillong ha ka 31 tarik u Nohprah, kaba dei ka sngi peit miet ban pdiang ia u snem bathymmai.
“One Love’ ka jingrwai kaba pawnam jong ka Blue kaba dei ka kynhun tem na ri Bilat kan wan ban pynshongshit ia ki paidbah ka jylla bad kane ka kynhun kala pynbna ia katei ha ka Instagram ka jongka @officialblue da kaba thoh, “Ngin don ha Shillong, India ha ka 31 tarik u Nohprah ha ka jingrakhe kaba kyrpang ia u Snem Thymmai”.
View this post on Instagram
Ki dkhot jong kane ka kynhun tem ki shynrang ki kynthup ia u Simon Webbe, Duncan James, Antony Costa bad u Lee Ryan.
Ki jingrwai kiba pawnam jong ka Blue ki kynthup ia ka One Love, All Rise, Too Close, If You Come Back, ka Fly By II bad kiwei kiwei kaba ki khynnah haduh kiba la heh ki ju sngewtynnad ban rwai bad shad ia kitei ki jingrwai.
Ka Blue kala ia rwailang ruh ia kaj ingrwa “Sorry Seems to Be the Hardest Word,” bad u Elton John bad kane ka jingrwai ruh kala pawnam bha bad ioh pdiang ia ka jingiaroh ha kylleng ki ri.
Watla ka Blue kala pynbna ban iashimbynta ha ka Concert kaban pynlong da ka Fukra Entertainment bad ka insider.in hynrei haduh mynta kam pat don satia kano kano ka jingpynbna ia ka jingdie ia ki tiket na ka bynta katei ka Concert.
Kane ka kynhun kala pynmih ia ki thup jingrwai kiba la ai kyrteng All Rise ha u 2001, One Love ha u 2002 bad Guilty ha u snem 2003 bad kala lah ban die haduh 15 million ha kylleng ki ri.
Ka Blue kala ioh khur ruh ia bun tylli ki khusnam kiba kynthup ia ka BRIT Awards bad kala mihkhmat ia ka UK ha ka Eurovision Song Contest ha u snem 2011 lyngba ka jingrwai ka jongka “I Can.”
Haba kane ka kynhun kala sangeh ia ki kam rwai ha u snem 2005, kumta ha u snem 2009 kila bteng biang ban pynmih ia ki jingrwai bad ban leit rwai ha kylleng ki ri bad kadei ka kynhun kaba la ioh pdiang ia ka jingeid ha kylleng ki ri.
