Shillong, Nohprah 03 : Ka Iingkashari Meghalaya High Court ha ka sngi Ba-ar, kala bthah ia ka Sorkar Jylla bad iaka National Highways and Infrastructure Development Corporation Limited (NHIDCL) ba kin iathungdieng lang hadien ba kila pom ia ki 103 tylli ki dieng ban shna ia ka surok National Highway na Shillong sha Dawki.
Haba pynmih ia ka hukum halor ka PIL, ka Iingkashari ba kynthup ia u Chief Justice IP Mukerji bad Justice W Diengdoh kala ong “Namar katei, ngi la pynwai noh ia ka PIL da kaba pynmih ia kane ka hukum : (i) Ngi bthah ia baroh ki liang mamla ba kin iasnohkti lang bad pynthikna ba ka jingthungdieng bala kdew ha ka paragraph haneng jong ka affidavit jong ka NHIDCL dei ban pyntrei pyrrkhing bha.
(ii) Ka jingshna ia ka highway, kaba dei kaba kongsan bha na ka bynta ka bha ka miat jong ka Jylla, ka jingpyndep ka dei kaba hap ban leh kloi, kaba long kat kum ka hukum ba shipor jong kane ka Iingkashari ha ka mukotduma bad kat kum ka ain bad pyndep ruh kham kloi kat kaba lah”.
Haba pynshong nongrim ia ka jingkyrpad bala buh lyngba kane ka PIL, ka Iingkashari kala pynmih ia ka hukum ha ka 7 tarik Naiwieng, 2024 ba khot ia ka kaiphod kaba pynkhreh lang da ka NHIDCL bad ka Sorkar Jylla na ka bynta ba kin tyrwa ban iathung dieng biang ha ka bynta jong ka 1st Package jong ka Highway kaba la iapom dieng.
