Guwahati, Nailur 20: U Myntri Rangbah ka Assam u Himanta Biswa Sarma hynne ka sngi Saitjain, ula pyntip ba la pyndep ia ka jingleh Post Mortem ia u nongrwai ba pawnam ka ri u Zubeen Garg ha Singapore.
Haba thoh hapoh ka rynsan X, u Sarma ula ong, “Ka post-mortem jong u nongrwai ba ieid eh u jong ngi u Zubeen Garg la dep ban pyndep ha Singapore. Ia ka met kaba sah ka jongu yn aiti ha ka kynhun kaba la leit synran – Shekar Jothi Goswami, Sandeepan Garg bad Siddharth Sharma (Manager) — ha ka jingdonlang ki ophisar na ka Indian Embassy.”
U Sarma ula pyntip shuh shuh ba la dep rejistar ia ka ejahar kaba la ujor ha Morigaon Police Station pyrshah ia u nongpyniaid ia ka tamasa u Shyamkanu Mahanta bad ia u Siddharth Sharma uba long u Manager jong u Zubeen Garg.
Ula ong, ba ki Pulit ka Assam kila rejistar ia ka ejahar bad ka jingtohkit kan sa sdang noh pyrshah ia u Shyamkanu Mahanta bad u Siddharth Sharma ryngkat bad ia kito kiba la ia donlang bad u Zubeen ha Singapore ha ka por ba ula khald noh.
U Myntri Rangbah ula iathuh ba, ki bor sorkar jong ka Singapore kila sdang ia ka jingtohkit halor katei ka jingjia bad namar ba katei ka jingjia kala jia shabar jong ka ri India, kumta ia ka bynta jong ka jingbishar ia ka kam bymman kan hap hapoh u pud u sam jong ka Singapore. Hynrei lada jia ba lap ba kala don kano kano ka jingiasuh buit napoh ka jylla Assam, ym sa shim ia ki sienjam hapoh ka jylla Assam ruh.
Ula pynthikna ba ka sorkar jylla kan pynlong ia ka jingtohkit kaba khuid bad kaba shai kdar halor katei ka jingjia.
U Sarma ula kyntu ruh ia kino kino ki briew kiba don ia ka jingthrang ban mih shakhmat kum ki sakhi ki satar, ka sorkar kan ai jingkyrshan pura ia ki bad kan pynkhreh ia baroh ki jingdonkam ban plie lad ia ki ha kaba iadei bad ka jingtohkit.
