Shillong, Risaw 02: U MLA ka BJP na South Shillong Bah Sanbor Shullai ula pynbna ba un sa thaw ia ka Committee ka ban khmih bad leh eiei halor ka jingnang jyllei jong u droks hapoh ka constituency.
Kane ka Committee kan kynthup ia ki nongmihkhmat na ki Dorbar Shnong, ki Village Council bad kiwei kiwei ki kynhun.
Haba iakren bad ki lad pathai khubor hadien ka jingialang bad ki Heh Pulit lem bad ki kynhun bapher bapher ha Jhalupara Community Hall, u Bah Sanbor ula ong “Ngin sa thaw ia ka Committee bad ngi sa jied ia ki dkhot na ki Dorba Shnong, Village Council bad ki kynhun bapher bapher bad ngin sap hah bad ai jingmut ia ki kyrteng sha ka Sorkar”.
“Dang shen ka Sorkar Jylla kala thaw ia ka Committee ban khmih ia ki jingjyllei u droks. Nga ruh ngan sap hah ia ka kyrteng na ka Shillong Contonment Area ba kin ioh rung dkhot ha kane ka Committee ba thaw ka Sorkar” ula bynrap.
Kane ka sienjam ka dei kaba shim hadien ka jingshah kem ka snar khaii droks ka Aisa Khatoon ba ju tip kum ka “Pahari”, kaba pyniaid iew ia u droks na Paltan Bazaar.
U Bah Sanbor ula ban jur ia ka jingkongsan ka jingiatreilang hapdeng ki kynhun ba iadonbynta lem bad ki jingai jingmut jong ka Committee ki ban sap hah sha ka Sorkar Jylla na ka bynta ban shim ia ki sienjam ba donkam ban leh.
Nalor ka jingiakhun pyrsha ia u droks, kane ka jingialang kala iakren ruh halor ki jingsngewkhia na ka jingwan rung ki briew ki bym ithuh ithaw ha ka thain bad ban jur ba baroh ki briew ki bym dei ki nongshongshnong ka thain, ki dei ban don ia ki kot ki sla kynthup ia certificate na ki Pulit ba kin ioh sah da ka jingithuh ka ain.
U Bah Sanbor ula maham ia kino kino ki nongshim wai ki bym pynbiang ia ki jingdonkam baroh lane kiba ai jaka rieh ia ki riew bymman, ba kin mad ia ki jingpynshitom kaba tyngeh kat kum ka ain.
