Shillong, Jylliew 28: Ka Sorkar Jylla shen kan sa thung ia ka Search Committee ka ban ai jingmut ia ki kyrteng ha kaban thung ia u Managing Director (MD) ba pura jong ka Meghalaya Energy Corporation Limited (MeECL) bad ki lai tylli ki shnat treikam jong ka.
“Ka Tnad bording kan sa pynmih ia ka jingpynbna (Notification) naka bynta ban thaw ia ka Search Committee, ka ban khlieh da ka Chief Secretary” ong u Symbud Myntri Rangbah ka Jylla ba khmih ia ka Tnad Bording Bah Prestone Tynsong haba iakren bad ki nongthoh khubor hynne ka sngi ba-ar.
U Symbud Myntri Rangbah u pyntip ba ka Tnad kan sa pyllait ruh ia ka Expression of Interest (EOI) bad kino kino kiba kwah ban trei kum ki MD ba pura jong ka MeECL ki lah ban applai.
“Hadien kane, ka Search Committee kan sa shong bishar ia ki kyrteng jong kiba thep bad kan sa ai jingmut sha ka Sorkar Jylla” ula bynrap.
Haba kylli, u Bah Prestone ula ong ba ka Tnad ka la rai ban khring ia ki Technocrats na kylleng ki bynta jong ka Ri ban thung ia ki kum u MD ka MeECL.
“Ka lah ban long na ka Central Electricity Authority (CEA) lane ka Ministry of Power namar kine ki dei ki technocrats ba shisha bad kiba don ia ka kyrdan jong ka Indian Engineering Services (IES)” ula ong.
Haba iaroh ia ka rai jong ka Kynhun Myntri, u Symbud Myntri Rangbah ula ong “Ngi kwah ban pynthikna ba u MD un khmih pura ia ka Corporation bad ki lai tylli ki shnat treikam khnang ba un lah ban pynjanai bad pynkylla dur ia ka rukom treikam jong ka MeECL”.
Halor ka rai ba dang shen jong ka Coordination Committee of Registered MeECL (Employees) Associations and Unions (CCORMAU) ba ka Sorkar Jylla ka hap ban siew ia palat T. 3000 klur kum ka Terminal Benefits sha ki Nongtrei ka MeECL, u Bah Prestone ula ong “Kam long kumta, nga tharai kila kren kyllum lang ia ka pisa ba hap siew ka MeECL. Ka Terminal benefits jong ki Nongtrei ka dei tang hadien bala pynkylla corporation ia ka naduh u snem 2010 bad kala don ruh ka soskular ban ai ia kane sha ki Nongtrei bala shongthait”.
U la kubur baka Sorkar Jylla ka sngewsih ba kam shym la lah ban siew ia ka pisa ba sah jong ki Nongtrei bala shongthait hynrei ula ong pat “Mynta ngi la pyrshang ban siew ia ki kat kum ka jingioh pisa na ka jingkynshew ka MeECL”.
U la bteng da kaba ong “Ngi kyrmen ba da ka jingkiew ka jingioh lum khajna bad jingduna ka jingduhnong kaba la don mynta da ki bun bun snem, nga thikna ba ngin sa lah ban siew lut ia baroh ka pisa ba dang sah jong ki Nongtrei bala shongthait bad ruh ia ka tulop jong ki Nongtrei ba dang don ha ka kam”.
Haba iadei bad ka jingpyntreikam ia ka Revamp Distribution Sector Scheme (RDSS), u Symbud Myntri Rangbah ula ong ba ka Sorkar Jylla kala dep ban phah ia ka DPR bad ka dang ap ban ioh ia ka pisa n aka Sorkar India.
“Nga tharai ba shen ngin sa ioh noh ia ka pisa bad hadien ba ngi la ioh, ka jingpyntreikam kan sa sdang noh” ula bynrap. Lah ban kdew hangne b aka Sorkar Pdeng kala mynjur dang she ia ka song tyngka ba T.1100 klur ban pyntreikam ia ka RDSS ha Meghalaya.
