Yn sngewtynnad ka HNLC ia jingkhot iakren u DyCM | Ka jingkem iaki Dkhot kan ktah ia ki paidbah ha Block-II

Shillong, Jylliew 14: Haba iaroh iaka jingkhot iakren iasuk, ka kynhun kieng atiar Hynniewtrep National Liberation Council (HNLC) hynne ka sngi Thohdieng kala pynpaw pat ba kam sngewtynnad ia ka rukom kren jong u Symbud Myntri Rangbah ka jylla uba khmih ruh ia ka kam Pohiing Bah Prestone Tynsong.

Ka HNLC kala kam ba ka jingkem dang shen ia ki dkhot kala ktah jur ia ki nongshong shnong ha ka Block-2, ia kaba la kynnoh ba ki dei kiba mad ia ka jingshah dawa pisa ha ki lehnoh na Assam.

“Ngi iaroh ia u Myntri Kam Pohiing Bah Prestone Tynsong uba la wer ia ngi sha ka jingiakren iasuk, hynrei ngim pdiang pat ia ka rukom kren ka jong u ha ka jingai khubor” ong u General Secretary-cum-Publicity Secretary ka HNLC u Bah Sainkupar Nongtraw ha ka kyrwoh.

“Ka sorkar India kam kwah ba ki nong India kin iakhun na ka bynta ka Russia hapoh Ukraine. Lada ka sorkar ka sngewkhia ia ki nong India ban iakhun na ka bynta kiwei pat ki ri, ngi ka HNLC ngi sngewkhia na ka bynta ki hynmen ki para Hynniewtrep ki jong ngi kiba iakhun ia ka India ha ka ri bad ha ka jylla. Kala dei ka por ba ki dkhot jong ka jaidbynriew kiba don ha ka kam shipai bad pulit ban sngewthuh ia ka jinglen bad ka jingtrei met bad mynsiem ka jongki na ka bynta ka jnglaitluid ka ri ka dei tang ka jingmutdur” ula ong.

“Ngi la iakhun pyrshah ia ka ri jong phi bad ia ka sorkar la bun phew snem, sngewbha wat nym kheiñ troin ia ngi. Ngi sngewthuh ia ka jinglong buit tuh ki politishan, wat nym pyrshang ban ialam bakla ia ngi. Ngim dei ki riewshimet kiba phi lah ban ong ban shad, kular ban khawai bad ban ym ai eiei pat hadien ba la h dep shad” ong u Bah Nongtraw.

U Nongialam ka HNLC ula ong ba 3 ngut ki dkhot ka HNLC kila shah kem ha ki pulit jong ka Ri Bhoi ki dei kiba sah ha Block 2, ka jaka kaba don da ka jingiakajia pud ha kaba ka sorkar Assam man la ki khep ka pyrshang ban klun be-aiñ ia ki jaka.

“Ki jingjia jong ki kam iaumsnam kiba la sdang da ki pulit Assam pyrshah ia ki jaidbynriew Khasi, ka jingpynjulor ia ki jingthung jingtep da ka tnad Forest jong ka Assam bad ka jingdawa pisa da ki lehnoh na Assam kadei kaba la bna bha, kaba la pynlong ia ka HNLC ban iada ia ka bha ka miat bad ia kito kiba sah ha ki khappud. Ka jingkem ia ki dkhot ki jong ngi da ki bor ka ain ha katei ka thaiñ kala ktah bad buh ha ka jingeh ia ki nongshong shnong ha katei ka thaiñ” ula ong.

U Bah Nongtraw ula ong, ba man la ka por ba ki dkhot jong ka seng kila shah kem ha ki pulit bad ki shna ia ki khana ban airong airup ba ngi dei ki nongleh kam bymman bad ki nongdawa pisa, katba ki kyntait pat ban leh eiei ia kito kiba donkti shisha ha ki kam bymman bad ki kam dawa pisa kiba don hapoh ki kyrdan jongki, ki ‘Mafia bamsap ha ka Uniform’ kiba iuhroit ia ka hok longbriew ha ka imlang sahlang.

Ula ong ba ka jingdon ki jyrsieh bad ki jingbamsap hapoh ka tnad pulit, kumba la sei madan da u Bah Iangrai u heh ophisar pulit, kala pynpaw shai ia ka jingdonkam ban don iaka jingai jingkhein bad ka jingdonkam ban pynkylla iaka rukom treikam.

“Ka imlang sahlang ka jongi kala shah leh shilliang da ki aiñ bad ha kito kiba la bamsmai ban bat ia ka aiñ” ong u Bah Nongtraw bad ka bynrap “Tang mynta ka taiew, ngi la pule ha ki kotkhubor shaphang uwei u rangbah Khasi uba la don 70 snem ka rta uba na ka shnong Pyrdiwah uba la shah kem ha ki pulit. Ula shah pyndait ruh da u ksew pulit. Ka long kaei kaei kaba sangsot ban iohi ba u riewrangbah un shah leh ha katei ka rukom. Katba ki riewshimet kiba dei ki bar jylla kiba leh ia ki kam sniew haba ki shah kem, la leh bha ia kaba ka jingbha, kaba lam sha ka jingiasuk noh bad ban pynkut noh ia ka kes”.

“Katei ka pyni shai kdar ia ka jingiadei ka bym khuid hapdeng ka Judiciary System bad ka Political Home Department ha Meghalaya,” ula kynnoh.

U Bah Nongtraw ula ong, watl kala long ka dak jong ka jingjop ba ka Kong Nongrang kala long ka longkmie Khasi kaba nyngkongeh ban bat ia ka kyrdan DGP, ka don pat ka jingsngewkhia ba ka lah ban shah bthah na ka bynta ban shakri ia ka bha ka miat jong ki bar jylla bad ki nongialam Garo, da ka bym kheiñ snep ia ka jinglah ka jongka ban wanrah ia ka jingkylla kaba shisha.