Shillong Nailar 26: Baroh kin phaikhmat sha ka Shillong Lajong FC kaba la pynkhreh ban iakhun pyrshah ia ka kynhun ialehkai ba pawnam jongka Indian Super League (ISL) ka Northeast United FC ha ka Semi Final kaba nyngkong jongka 133rd Durand Cup 2024 kaban long ha Jawaharlal Nehru Stadium, Shillong mynta ka sngi Nyngkong.
Ia ka Durand Cup, la pynlong nyngkong eh ha u snem 1888, kadei ka jingiakob ialehkai kaba rim tam ha ka dewbah Asia bad kaba 5 ha ka pyrthei kum ka jingiakob ialehkai kaba la rim tam.
Mynta ka kynti, ka Shillong Lajong kala long ka kynhun kaba khlain kaba la pynliem ia ki kynhun kiba khlain ha ka ri India. Kala pynrem ia ka East Bengal FC kaba la wan baar ha ka Durand Cup kaba la long mynshem snem bad kumjuh ia ka FC Goa kaba la jop ia ka Durand Cup bad ISL ha u snem 2021.
Ka jingiakhun mynta kan long kaba shongshit bad kaba itynnad bha ia kaba bun ki khmih lynti ba kan dei ka jingiakhun kaba itynnad tam kaban ialehkai ha Jawaharlal Nehru Stadium.
Ki tiket kiba die kila lut mardor hi bad kumta la khmih lynti ba ki paidbah kin dap smam ha ka stadium ha kaba kin don palat 10,000 ngut ki nongkyrshan.
Ka East Bengal kam shym la lah ban tehlakam ia ka Shillong Lajong bad ka jingkylli kaba mih mynta ka long hato ka Northeast United kan lah ban tehlakam ia ki rang ialehkai pyrshah ia ka Shillong Lajong FC ryngkat bad ki hajar ngut ki nongkyrshan ka Shillong Lajong.
Kala don ruh ka khubor hamsaia ba u trai ka Northeast United u John Abraham uba dei ruh u khlur ak phlim ka Bollywood u lah ban wan peitkai ia kane ka jingiakhun ha nongbah Shillong.
