Shillong, Naiwieng 04 : Ka jingpynheh ia ka Shillong Airport la khmih lynti ba kan dep hapoh ka 18bnai na ka sngi ba aiti ia ka work order, ong u Symbud Myntri Rangbah Bah Sniawbhalang Dhar ha ka sngi Ba-ar.
Ka jingkhot tender ka dang iaid shakhmat bad ka Airport Authority of India kan dang ban aiti ia ka kam ban pyntrei.
U Bah Sniawbha ula iathuh ba ka Sorkar Jylla kam pat aiti satia ia ka jaka ban pynheh ia kane ka kad hynrei baroh kiei kiei kila iaid ha ka lynti kaba dei. Ula kyrpad ia ka AAI ba kan pynsted noh ia ka kam namar ka Agency ba pyntrei kam dei satia na ka Sorkar Jylla.
Haba iadei bad ka Baljek Airport, u Bah Sniawbha ula iathuh ba ka Sorkar Jylla kala kyrpad ia ka AAI ba kan pynlong ia ka jingjurip ban ithuh bad ioh jingkhein ia ka jaka ba donkam ban pynheh ia ka kad. Ka Sorkar ka dang ap ia ka jubab na ka AAI.
Halor ka jingdawa ban wan pynhiar ia ki liengsuin kiba kham bha ha Baljek Airport, u Bah Sniawbha ula ong ba ka kam ba hakhmat eh ka dei ban pynkhreh shuwa ia ka Airport bad yn sa iakren ia kane ka kam.
Ka Sorkar Jylla kala iasoi ia ka soskular ban aiti ia ka Airport sha ka Airport Authority of India.
