Shillong, Kyllalyngkot 10: U Myntri ka pule puthi ka jylla u Rakkam Sangma hynne ka sngi Balang ula pyntip ba ka Jylla kan sdang pyndonkam noh ia ki kot NCERT naduh mynta u snem hynrei kan long shuwa tang ha ka sobjek English, Maths bad Science bad ha u snem ban wan, yn sa pyndonkam lut ha baroh ki sobjek.
Haba iakren bad ki nongthoh khubor, u Rakkam Sangma ula ong, ba ka jingsdang pyndonkam ia ki kot NCERT ka dei ban long naduh ka 16 tarik u Kyllalyngkot hynrei namar ka jingwan ka President jong ka ri kumta yn pynkynriah noh sha ka 25 tarik mynta u bnai bad kane ruh kan shong kat kum ka jinglait jong u Myntri Rangbah ka jylla.
U Rakkam Sangma ula ong, ba ia ki kot lah ban ioh naduh mynta u bnai namar ba yn sdang pyndonkam noh ia kitei ki kot skul naduh une u snem pule uba mynta.
“Ki kot NCERT kiban pyndonkam ki kynthup ia ka sobjek English, Maths bad Science ia mynta u snem, namar kam da donkam than ban pynkylla eiei” ong u Rakkam.
Ula ong ba ia kitei ki kot skul yn pyndonkam naduh ka klas I haduh klas XII hynrei na ka bynta ki skul kiba hikai ha ka ktien Khasi bad Garo ki lah ban pyndonkam shwa da ki kot kiba ki hikai mynta hynrei naduh u snem ban wan yn pyntreikam pura noh da ki kot skul NCERT.
Ula ong, na ka bynta ka Social Science ka don ka bynta kaba hap ban pyndam bad kumta la thaw iaka Committee khnang ba kin lah ban pynbeit bad pynkylla bad ban pynrung noh ia ki bynta jong ka jylla bad ia kane ka kam yn leh mynta baroh shi snem.
Ula ong ba ki don bun tylli ki skul haka jylla kiba pyniasoh bad ka MBoSE hynrei kim shym la pyndonkam pat ia ki kot skul kiba labthah da ka MBoSE, kumta ka tnad pule puthi kan kan sa bthah ia baroh ki skul ba ka long kaba kongsan ban pyndonkam beit da ki kot skul jong ka MBoSE.
“Mynta u snem, ngin ym lah ban pyntreikam pura ia kane hynrei la thikna ba ha u snem ban wan, ka jingpyndonkam da ki kot NCERT ha ka MBoSE kan long kaba kongsan ia baroh ” ong u Myntri ka pule puthi.
Ha kaba iadei bad ka jingpyrshah ki nongdie kot ban pyntreikam mardor ia ki kot NCERT, u Rakkam ula ong, “Namar katto katne ki daw, mynta u snem ngin ym lah ban pyntreikam pura hynrei naduh u snem ban wan, ngin pynthikna ba baroh ki skul kidei ban pyndonkam beit da ki kot skul kiba la bthah da ka MBoSE”.
“Ha ka pule puthi, artylli kiei kiei kim dei ban jia, ka politic bad ka kam khaïï. Kaei kaba dei ban pule bad kaei ka Curriculum kaba dei ban pynwandur ne ka Syllabus ne kaei kaba ki khynnah kidei ban pule kadei ban dein kaba la pynkhreh bad rai da ki nonghikai, ki riewstad, Professor, ki jaka pule bad ym da ki nongkhaïï bad ha ka jingpyniaid ia kino kino ki jaka pule kam dei ban don ka politik, namar lada kwah ban pynduh pyndam ia kano kano ka jaka pule pyndonkam da ka buit politik bad kan sa don ka jingiapait hapdeng ki nonghikai bad ki khynnah pule bad ban iatan iwei iawei pat bad ha kaba kut ka jaka pule kan sa hiar arsut” ong u Rakkam.
