Imphal, Lber 31:Ka sorkar Manipur ka la shim ia ka rai ban ban iit bniah ia ki phetwir nong Myanmar kiba wan wad jaka riehtngen ha kane ka jylla ka thain shatei lammihngi (Northeast) bad ban buh ia ki ha ki jaka shong shipor ba la pynkhreh ki ban iahap kum ki jaka set, ong u heh sorkar.
Haduh mynta ki la don haduh kumba 5,000 ngut ki poiwir kaba kynthup ia ki kynthei bad khynnah kiba la wan phet namar ka jingiaumsnam hapoh Myanmar, kata hadien ba ki bor shipai ki la kurup ia bor synshar naduh u bnai Rymphang 2021.
U heh sorkar u la ong ba na ka liang ka sorkar Manipur dang shen ka la thaw ia ka Cabinet Sub-Committee ba la khlieh da u Myntri ba dei khmih ia ka tnat Tribal Affairs and Hill Development u Letpao Haokip hadien ba da ki hajar ki nong Myanmar ki la wan rung shapoh ka jylla namar ki jingiaumsnam hapdeng ki shipai ka Myanmar bad ki riewialeh pyrshah ka kynhun People’s Defence Force (PDF) ha ki bynta khappud ka India.
Katei ka committee ba la khlieh da u Haokip ha kine ki khyndiat sngi ba la dep ka la pynlong ka jingleit jurip ia ka Moreh ha ki bynta khappud bad ka Myanmar kumjuh ia ka shnong Gamphazol kaba hap hapoh Chandel district ha kaba ki la ioh ruh ban iamir jingmut bad ki paidbah nongshong shnong.
Ka Manipur ka iasam ia ki jaka khappud kaba ha ka jingjngai kaba kumba 400 km bad ka Myanmar.
Ki myntri ia kiba la synran lang da ki heh sorkar ki la buh ka jingkyrpad ia ki nongshong shnong ba kin iarap lem ia ki heh sorkar ba kin ithuh ia ki poiwir nong Myanmar bad ban ym pdiang ia ki hapoh la ki jong ki iing ki sem.Baroh ki nong Myanmar kin hap ban shong hapoh ki jaka shong shipor ba la pynkhreh lypa bad ba kin hap ban leitphai pat shapoh Myanmar hadien ba ka jinglong jingman ka la kham jai jai, ong u Haokip lyngba ka lad pathai khubor.
Napdeng ki phetwir, u MP ka Myanmar u Thangsel Haokip uba la wan phetrieh sha Manipur la ong ba u la pyntip sha ka kynhun myntri ha Moreh ba ki kwah ban shong shipor ha ki bynta jong ka India katba ka jingiaumsnam hapdeng ki shipai ka Myanmar bad ka PDF ka dang iai bteng ha ki bynta jong ka thain Saingang hapoh Myanmar kaba hajan khappud bad ki jylla jong ka India hapoh Manipur, Nagaland bad Mizoram.
Kane ka jingiakynad hapdeng ki shipai ka Myanmar bad ki riewialeh pyrshah PDF ka la pynlong ruh ia ka sorkar Manipur ba kan pynjur ia ka jingpahara ha lynter ki jaka khappud bad kyntu ruh ia ki shipai ka Assam Rifles ba kin long kiba peitngor ha ki jaka khappud jong ka ri.
Na ka liang u Myntri Rangbah (CM) ka Manipura u N. Biren Singh kham hashwa u la ong ba ki la pynjur ia ka jingpahara ha baroh ki bynta khappud jong ka India bad ka Manipura khnang ban khanglad na kino kino ki jingjia kiba lah ban wan jia.
Haduh kumba 31,000 ngut ki nong Myanmar ki la don hapoh ki jaka shong shipor ha Mizoram hadien ba ki shipai ki la kurup jubor ia ka bor synshar ha katei ka ri naduh u bnai Rymphang 2021.Na ka liang ka sorkar Mizoram, ki kynhun seng bhalang bapher bapher bad ki kynhun balang ki la pynbiang ha kaba iadei bad ka bam ka dih bad ka jaka shong jaka sah na ka bynta kine ki nong Myanmar, kata kaba kynthup ia ki kynthei bad khynnah.
