Iakynduh ka FKJGP ia ki Heh Post Office halor ki Gramin Dak Sevak
Shillong, Naitung 24 : Ka Federation of Khasi Jaintia & Garo People (FKJGP) ha ka sngi Balang, kala leit pan jingshai na ki borkhmih ka Post Office halor ka jingthungkam ia ki Gramin Dak Sevak ha ki Post Office ba don hapoh ka Jylla Meghalaya.
Kat kum ka jingong u President ka FKJGP Bah Dundee C Khongsit, jan baroh ki 445 tylli ki kam Gramin Dak Sevak ki dei kiba la thung ia ki briew kiba dei nabar ka Jylla. Ula ong ba kane baroh ka dei namar ka jingbym iohlad ban jied ia ka ktien Khasi bad Garo ha ka eksamin thungkam, kaba long ka jingduhnong ia ki samla trai Jylla.
U Bah Dundee ula kdew ba ha kine ki Jylla ka thain Shatei Lam Mihngi kum ka Mizoram, Manipur bad Nagaland, la shah ia ki nongaplai kam ba kin iakhun ia ka eksamin da ki ktien lajong. Ula pynrem ia ka Sorkar Jylla halor ka jingbym leh eiei ia kane ka kam mynta la ar-lai snem.
U Bah Dundee u iathuh ba ha ka jingiakren bad ki Heh ka Post Office, la sngewthuh ba ka dei ka kamram jong ka Sorkar Jylla ban thoh sha ka Ministry of Communication bad Central Post Office, khnang ba ki samla Khasi-Jaintia bad Garo kin ioh ia ka lad ban iakhun ia ki eksam da ka ktien Khasi ne Garo.
Ula ong ruh ba ha kane ka jingiakynduh, la shem ba ki dang don haduh 683 tylli kam bapher bapher ki ban sa lait jong ki post office ha Meghalaya bad ki bor pyniaid ka Post Office kila dep thoh sha ka Ministry of Communication bad Deprtment of Post Office ka India ban pyntreikam ia ka “Optional Language System” na ka bynta ki samla Khasi-Jaintia bad Garo.
