Shillong Naitung 24: U Lat ka jylla u Phagu Chauhan hynne ka sngi Balang ula ia kynduh ia ka kynhun kaba la ialam da u Dr KC Boro, MLA bad u Myntri barim ka jylla ha Raj Bhavan, Shillong.
Ha katei ka jingiakynduh u Dr. Boro ula pynsngew ha u Lat ka jylla halor kawei ka jingjia kaba shyrkhei halor ka jingshah leh khlem akor ki arngut ki khynnah kynthei riewlum kiba dei na ka jaidbynriew Koch, kaba la jia ha ka 16 tarik Risaw, 2024, ha Ampati, South West Garo Hills District.
Ha ryngkat ka jingdonlang ki dkhot jong ka Meghalaya Koch Women Welfare Association (MKWWA), u Dr. Boro ula pynpaw ia ka jingsngewkhia kaba jur halor katei ka jingjia bad ula ai ruh ia ka dorkhas ha u Lat ka jylla .
Ki lanot kila dawa ia ka bai lutksan kaba T.10 Lak, ka pisa kaba heh tam kaba la shah katkum ka Victim Compensation Scheme 2022.
U Lat ula sngap ia ki jingeh jongki bad ula pynthikna iaki ban ai iaka jingkyrshan bad ban pynioh ia ka jingbishar kaba ka hok.
Da kaba sngewkhia halor katei ka jingjia, u Latka jylla ula pynbna ia ka jingiarap pisa kaba T.50,000 lyngba ka Discreationary Grant sha ka lanot ha katei ka jingjia.
Ha katei ka jingialang kila kren ruh ia ki mat kiba ktah ia ki jaidbynriew kiba sah ha katei ka thain.
U Lat ula banjur halor ka jingdonkam ban pynthikna ia ka jingshngain bad ka jingiada ia baroh ki nongshong shnong khamtam ki kynthei bad ki khynnah bad u la pynpaw ia ka jingdonkam ban shim ia ki lad ki lynti kiban iada ia kum kine ki jingjia hadien habud.
Ula pynthikna ia u Dr Boro bad ia katei ka kynhun, ba ia kane ka kam yn sa rah iakren sha ki bor ba dei peit ban shimkhia mardor.
