Dimapur, Risaw 26 : Ka NSCN-IM kala ong ba ka Ntangki national park ha Nagaland yn bteng ban iada bad pynneh pynsah kum ka jingdon jingem jong ka ri ki Naga, kata wat lada la lah ne ym lah ban ban weng pat ia ki jingeh kam sain hima jong ki Naga.
Kane ka kynhun kieng atiar hynnin ka sngi ba Ar kala pynmih ia ka jingthoh shibynta ban pynphai kylliang halor ki jingkynnoh kiba la mih dang shen da ka seng Senior Citizen Association of Nagaland (SCAN) kaba la kynnoh ba kane ka national park kala don mynta hapdeng ka jingpyniaid ba pura jong kane ka kynhun kieng atiar.
Katei ka kynhun kala ong ruh ba kino kino kiba ktah ia ka bha ka miat jong ka ri ym dei ban ailad ba kin lait na ka jingbishar jong ki paidbah, kada lada ka don ka jingsuba halor ka jingbakla.
Ka NSCN-IM kala ong ba kala don ha ka rekod ba ka Ntangki National Park ka dei tynrai jong ka shnong Old Bisumpui bad ba ka don ruh ia ki pud ki sam kiba la kdew shai.
Nalor kata kala ong ruh ba ka dei ka jingdonkam kyrkieh ban iada ia ka khlaw Ntangki bad ia ki mrad ki mreng kiba don hapoh jong ka ha ka por ba la pynlong ia ka national assembly ka NSCN ha Gilgal Camp ha ka snem 1996, ha kaba kala shim ia ka rai ban iada bad ban pynneh pynsah ia ka khalw Ntangki lem bad ia ki mrad ki mreng kiba don hapoh jong kane ka khlaw.
Katkum ka NSCN la ong ba ym shym la shah shuh ban thaw ia ki shnong thymmai hapoh jong ka Ntangki National Park.
Nalor kata kala ong ruh ba ha ka por ka jingpynlong ia ka jingiakren kam sain hima sima hapoh kane ka kynhun bad ka sorkar India, ka Ntangki National Park kam shym la don satia ha ka mat jong ka jingiakren namar kane kam don bynta ei ei ruh ha kaba iadei bad ki jingiapynbeit halor ki kam sain hima sima jong ki Naga.
Shuh shuh kane ka kynhun kala ong ba kalong kaba sngew bynniaw shibun ba ka SCAN kala kynthoh pyrshah ia ka NSCN da kaba ialam bakla ba kala kurup pura ia ka Ntangki National Park.
“Haba pynpaw halor ka jingkhia jong kane ka kam, ka SCAN kala dei ban kham pynpaw ia ka jingkitkhlieh bad ym ban shu kynthoh pynbitar pyrshah ia ka NSCN,” ong shuh shuh kane ka kynhun.
Shuh shuh kala ong ruh ba katei ka kynhun seng kala dei ban shim da ki sienjam ki ban pynpaw ia ka jingshemphang ha kaba iadei bad katei ka mat ha ka jaka ban shu pyrta shla bad kynthoh pyrshah ia ka NSCN.
