Shillong, Lber 17 : Ki nongmihkhmat na ki 12 tylli ki pyrthei kin wan iashimbynta nalor ki nongkynshew kam na kylleng ki Jylla ka Ri ha ka 7th Act East Business Show ha Shillong ban iawad ia ki lad iatreilang bad kynshew kam.
Ia kane ka prokram la pynlong da ka Indian Chamber of Commerce ha ka jingiatreilang bad ka Sorkar Meghalaya, ka ban sdang naduh ka 25 haduh 27 tarik Lber, da ka jingthmu ban pynkhain ia ka jingiadei ha ka kam khaii pareng hapdeng ki Ri BBIN bad ASEAN, haba pynleit jingmut ia ki kam kum ka Technology, Agriculture, Tourism bad kiwei kiwei.
Ia kane ka jingialang yn plie da u Myntri Rangbah ka Jylla Conrad K Sangma ha ryngkat ki Heh Ophisar na ka Sorkar India bad ki heh ki hain jong kiwei ki Ri. Kane ka prokram kan wanrah ha kajuh ka jaka ia ki nongseng karkhana, ki nonthaw policy, bad ki stad ki jhad ba kin iakren halor ki lad kynshew kam ha Meghalaya.
Ki heh ki hain jong kiwei ki Ri ba kynthup ia kiba na Philippines, Germany, Indonesia, Cambodia, UAE, Japan, Bangladesh, Bhutan bad Nepal, kila pynthikna ia ka jingwan iashimbynta nalor ki nongsengkam sengjam jong kitei ki Ri. Ki nongseng kam sengjam na India ruh kin wan ban iashimbynta ban peit ia ki lad seng kam ha Meghalaya.
Kane ka prokram kan pynleit jingmut ha ki lai bynta kata ban pynkupbor ia ka jingkiew shaphrang lyngba ki Technology bad ki buit treikam ha Meghalaya, ban pynlong ia ka Thain Shatei Lam Mihngi ka Ri India kum ka Export Hub ki marrep marriang, ki jingri jingdup, ka food processing bad ka North East Travel, Tourism & Hospitality.
Ha kine ki lai sngi, ka business show kan pynlong ka jingialang B2B bad B2G, ka jingiakren ban iasengkam sengjam lang, ka lad ka lynti ban iatreilang, ka kam shalan mar, ka sengkam thymmai, ka Producer Organisation (FPO) bad kompani (FPC) ha Meghalaya.
