Shillong, Naiwieng 21 : Ka Meghalaya, kaba la ithuh kum kawei na ki jaka ba biang eh ban ialehkai paragliding,kan sa pynlong ha ka sien ba nyngkong eh ia ka “Open Paragliding Accuracy Championship Asian Leaque” ha shnong Rapleng, East Khasi Hills naduh ka 7 tarik haduh 10 tarik Nohprah.
Ia kane ka jingialehkai yn pynlong da ka Meghalaya Aero and Adventure Sports Association (MAASA) bad ha kane ka jingialehkai yn sakhi ia ka jingwan iashimbynta ki pilot na kylleng ki jylla ka Ri bad ki Ri ka pyrthei.
Haba iakren bad ki nongthoh khubor, u Chief Judge jong kane ka jingiakop bad dkhot ka Federation Aeronautique Internationale (FAI) India Raju Rai ula ong ba ka jingthmu haba pynlong ia kane ka jingiakop ba heh bha ha Meghalaya ka long eh ban kyntiew ia ka Adventure Sport ha ka Jylla, kaba la kyrkhu da ki lum ki wah bad jaka ba lhuh bad ka jingbeh lyer kaba biang paka ban pynlong ïa kum kine ki jait jingïalehkai.
“Ka Meghalaya Accuracy championship kaba iabynrap lang bad ka Asian League bad ka dei ka sien nyngkong ba kan urlong ha India bad kiba jop na kane ka jingïakob kin ïoh rung sha ka Asian League kaban long ha Thailand ha u snem 2023” ong u Rai.
U Rai u pyntip ruh ba katkum ka kyndon jong ka FAI, tang 100 ngut ki pilot ne ki nongïashim bynta kin don ha kane ka jingïakob bad ka jingregister ka dang ïaid shaid shaid bad tad haduh mynta ka sngi ki don palat 143 ngut kiba na India bad nabar Ri ba kynthup naka ri USA, South Korea, Thailand, Indonesia, Nepal, Singapore bad Vietnam kila register bad ka MAASA.
U la pynpaw ruh ïa ka jingsngewtynnad ba ka Meghalaya ka dei kawei na ki jaka kiba biang paka ban pynlong ïa kane ka paragliding sport bad mynta ka MAASA ka la kyntiew ïa kiba ïa shim bynta sha ka 110.
“Ka Meghalaya ka dei ka jylla ba la kyrkhu halor ka jinglong jong ki jaka bad ka mariang bad kane kan ailad ïa kiba pilot ba kin her hynriew haduh hynñiew kynta shisngi ban iarap khamtam eh ia ki pilot na Jylla ba kin hikai pyntbit khnang ba kin lah ban iakop bad ki pilot na ki ri bapher bapher” ula bynrap.
Naka liang u president ka MAASA u bah Desmond Nongkhlaw u la ong ba ïa mynta ki la dep ïakren bad ka sorkar jylla bad ka MAASA ka la ïohpdiang T. 25 lak ban pynlong ïa kane ka championship.
U Bah Nongkhlaw u ïathuh ruh ba ka MAASA ka dang bteng ban ïakren bad ka sorkar ban kyntiew ïa ka mang tyngka khnang ba kin lah ban pynlong ïa ka jingïakob kaba jop pura bad ban lah ban ai jinghikai ïa ki samla ka jylla.
“Ka MAASA ka ju ai jinghikai ïa ki samla ka Jylla ha Madan Rapleng East Khasi bad ïa kane la bei tyngka da ka Meghalaya Skill Development Society (MSDA) bad tad haduh mynta ki don 32 ngut ki samla kiba shah hikai ha ka MAASA” ong u Bah Nongkhlaw.
Ula ïathuh ruh ba kine ki samla kiba shah hikai ha Madan Rapleng kin hap ban pynkhreh ïalade la kumba 2 haduh 3 snem khnang ba ki ruh kin lah ban leit shim bynta ha ki lympung bapher bapher bad lyngba kine ki jinghikai ruh ki lah ban pynim jakpoh ialade na kane ka kam.
