Shillong, Rymphang 10: U Myntri ka kam jngohkai Timothy D Shira ula pynbna ia ka jingthmu ban kyntiew ia ka kam jngohkai ha ka jylla, da kaba pynleit jingmut ha kaban kyntiew ia ki jingtei.
U Myntri ula pyntip ba lashai ka sngi kan sa don ka jingialang ban aiti ia ka jaka ha Tura, ia kaba la ju tip mynshwa kum ka Polo Orchid, sha kawei ka kynhun pyniaid Hotel kaba nabar ri ban pynkylla sha ka 5-star hotel.
“Ka sorkar ka dang pyrshang ban leh bun kiei kiei ban kyntiew ia ka kam jngohkai ha ka jylla Meghalaya baroh kawei” la ong u Shira haba iakren bad ki nongthoh khubor hynne ka sngi baar.
Ka projek jong ka hotel kan kot ia kumba T.40 Klur ia kaba yn tei ha ka jaka kaba 1-2 akar da kaba iatreilang bad ka kynhun shimet.
U Shira ula pynpaw ruh ia ka jingthmu ban kyntiew ia ka jingpyniasoh ha ka leit ka wan haba kdew ba ka kad liengsuin kaba jan tam kadei jongka Guwahati, hynrei ka Baljek airport kaban sa wan, kan iarap ha kaban pynduna ia ka jingleit sha Tura da 30 Km.
Kiwei pat ki projek ki kynthup ia ka T.23 klur ka Tourist Lodge ha Siju bad ka T.23 klur ka Convention Center ha Resubelpara.
Nalor kane, yn kyntiew ruh ia ka Mondalgre ha ka jinglut kaban kot T. 23 klur.
U Shira ula banjur ia ka jingdonkam ban iasnohkti lang ki shnong ki thaw ha kaban kyntiew ia ki jingtei ha ka kam jngohkai bad ka ai nuksa ba kala don ruh ka jingpyrshang ha ka Nokrek Biosphere ha kaba ki nongshong shnong kila shim ia ki sienjam ban khmih ban peit ia ka jingkhuid jingsuba.
“Ka shnong ka thaw mynta kala shimkhia bha ban pyniaid ia ka. Ki lah dep sam ia ki notis ba ym shah iano iano ruh ban bret ia ki niut pathar ha kylleng ki jaka bad ym shah iano iano ruh ban leit shabar kat shaba lap ba shem” ula ong bad ka bynrap ba la pynbiang ruh ia ki jaka leit shabar ban kyrshan ia katei ka sienjam.
