Kohima, K’lyngkot 31:U Myntri Rangbahduh (PM) Narendra Modi un pyniaid ia ka parliamentary meet jong ka BJP mynta ka sngi ha kaba yn shim ia ka rai kaba khatduh ha kaba iadei bad ki kyrtong na ka bynta ka ilekshon assembly ha Nagaland.
Ha kane ka jingialang ka ban long ha New Delhi yn ia don lang ruh u president ka BJP Nagaland u Temjen Imna Along ha ryngkat ki nongialam ka party nalor u Symbud Myntri Rangbah (Dy CM) u Y Patton.
Ki khubor ki pynthikna ruh ba ka jingiabhah seat kaba 40-20 hapdeng ka Nationalist Democratic Progressive Party (NDPP) bad ka BJP kan dang iai neh kumjuh, kata wat hadien ba ki la mih ki jingiakhih ha ki katto katne ki jaka naduh kine ki khyndiat sngi ba la dep khamtam na ki dkhot jong kane ka party.
Ka NDPP kumjuh na ka liang u Myntri Rangbah Neiphiu Rio ki la iai ban naduh kine ki snem kiba la dep ba kane ka jingiabhah seat kan dang iai neh kumjuh, bad ka jingiasynrop lang kan dang iai bteng mynta u 2023 kumba la pyntreikam naduh ka ilekshon 2018 ba la dep hapdeng ka BJP bad ka NDPP.
Ha kawei pat ka bynta, ka sorkar synshar Nationalist Democratic Progressive Party (NDPP) ka la mynjur ban phiah ia ki sawtylli ki seat ha ki jaka sor jong ka bad ka paralok synrop BJP ha kane ka ilekshon assembly ka ban wan ha Nagaland.
Katkum ki khubor, kane ka jingiasynrop lang hapdeng kine ki ar party kan dang iai bteng hapdeng 40-20 seat ia kaba ka NDPP bad ka BJP ki la pyntreikam ha ka ilekshon 2018, kata watla ka jingshisha ki la don bun bah ki nongialam na baroh ki ar party kiba dawa na ka bynta ka jingkylla.
Katkum ki tyllong khubor ka NDPP la ong ba ka BJP ka kwah ia ki sawtylli ki seat ha ki jaka sor, kata nalor ki 20 tylli ki seat jong ka, kata ka Kohima Town, Mon Town, Tuensamg Sadar-II, bad ka Wokha ia kaba na ka liang u CM ka jylla u Neiphiu Rio ruh ula dep ban pdiang.Ia kane ka jinglong jingman la dep ruh ban pynthikna da ki nongialam jong ka BJP ka jylla.
