Agartala, K’lyngkot 31:U nongialam ka party TIPRA Motha u Brajlal Debbarma ha ka 30 tarik mynta u bnai ula iehnoh kam hadien ba u la shah pynduh tiket napoh Kamalsagar Constituency.
U Debbarma u la ong ba ula trei borbah na ka bynta ka party da ka jingkyrmen bad ka party kan pynioh tiket ia u.
“Nga la trei borbah da ka jingkyrmen ba ka TIPRA Motha kan pynioh tiket ia nga napoh Kamalsagar constituency.Hynrei ngam shym la ioh satia,” ong u Debbarma hadien ba ula iehnoh kam.Nalor kata u la ong ruh ba palat 3000 ngut ki nongkyrshan shen kin pyniasoh noh sha ka Trinamool Congress ha ryngkat bad u.
Ha kawei pat ka bynta, u MLA ka BJP u Dr Atul Debbarma ula phah ia ka shithi iehnoh kam ha ka 30 tarik mynta u bnai kum u MLA napoh Krishnapur (No-29) tribal reserve Assembly constituency.
U Atul u la phah ia kane ka shithi iehnoh kam sha u Lamphang ka iingdorbar thawain u Ratan Chakraborty.Hynrei watla katta um shym la kdew satia ia ki daw kiba la pynlong ia u ba un iehnoh kam.
U Dr Atul Debbama, u dkhot ba la rim bha ka RSS bad uba dei ruh u doktor ba pawkhmat ka AIIMS, Delhi, u la pyniasoh ia lade sha ka kam sain hima hashwa jong ka ilekshon assembly 2018, bad kylla long u MLA hadien ba u la jop napoh Krishnapur (No-29) Assembly constituency kaba dei ka jaka ba la mang kyrpang na ka bynta ki trai shnong.
Hynrei, ha kane ka kynti kaba mynta u la shah weng noh kum u kyrtong hadien ba ki nongialam ka BJP napoh central ki la pynbna ia ka list jong ki kyrtong ka party na ka bynta ka ilekshon ka ban long ha ka 16 tarik u Rymphang 2023 ha ka 28 tarik mynta u bnai khlem kano kano ka jingiamir jingmut lang bad u.
Ki tyllong khubor kiba iajan bad u Dr Atul Debbarma ki la ong ba kane ka jingleh jong ki nongialam ka BJP ka jylla bad central ka la pynkyndit jur na ka bynta jong u.
