Shillong, Nailur 26: Ka Board of Control for Cricket in India (BCCI) kan ai burom ïa u nongrwai ba pawkhmat jong ka Jylla Assam uba la khlad noh u Zubeen Garg ha ka por ba plie ïa ka ICC Women’s ODI World Cup 2025 ka ban long ha ka 30 tarik Nailur ha Guwahati.
U joint secretary ka BCCI u Debajit Lon Saikia u la ïathuh ba ïa ka jingialehkai ba nyngkong jong ka ICC Women’s ODI World Cup 2025 la pynlong lang da ka BCCI bad ka Assam Cricket Association (ACA) ha kaba ka India kan ïakhun pyrshah ïa ka Sri Lanka ha ACA Stadium.
U Saikia u la ong ba haka jingshisha la thmu ban pynlong ïa ka jingialehkai kum ka jingrakhe kaba heh, hynrei namar ka jingkhlad kyndit jong u Zubeen Garg ha Singapore ha ka 19 tarik Nailur, ka BCCI ka la rai ban pynduna ïa ka jingrakhe bad ha kane ka sngi yn tem daka jingrwai kaba 40 minit ia u nongrwai ba ieid eh jong ka Jylla.
Ha kane ka jingai burom yn don ki jingrwai da ki nongrwai ba pawnam ba kynthup ïa u Papon (Angarag Mahanta), u Joy Barua, u Shreya Ghoshal, bad ka Shillong Choir.
“Kane ka dei ka sien kaba nyngkong ba ka Assam kan pynlong ïa ka jingïalehkai World Cup. Ngi kyrpad ïa ki paidbah jong ka jylla, bad ka thaiñ Shatei Lammihngi baroh kawei ban ïadon bynta lang ha kane ka sngi ba pawnam bad ruh ban ai burom ïa u Zubeen Garg, uba la ieid da ki pateng ki pateng kiba ieid ïa ka put ka tem” la ong u Saikia.
Haka sngi ïalehkai jong ka India la khmih lynti ba ka madan ACA kan dap haduh 40,000 ngut ki nongpeitkai.
Ula ong ba ki jingpynbeit kiba khlain ki don ha ka jaka, kynthup ia ki jingpahara kiba bun bad ki Pulit pyniaid kali namar ba ka sngi ialehkai ka iahap bad ka Mahashtami ha ka por Durga Puja.
Ïa ki tiket naka bynta ka ICC Women’s World Cup 2025, kynthup ïa ka jingïalehkai ba nyngkong ha Guwahati, la lah ban ïoh ha baroh kawei ka ri bad la die online lyngba ka BookMyShow.
 kan ai burom ïa u nongrwai ba pawkhmat jong ka Jylla Assam uba la khlad noh u Zubeen Garg ha ka por ba plie ïa ka ICC Women’s ODI World Cup 2025 ka ban long ha ka 30 tarik Nailur ha Guwahati.){kind=link}