Shillong, Lber 01: Ka Myntri ka Koit ka Khiah ka Kong Ampareen Lyngdoh hynne ka sngi Thohdieng kala ong, ba shen, yn sa phah ia ki Doctor bad ki Nurse sha ki jaka ban ioh jinghikai ne Training ba kin nang ban iadei bad ki paidbah kiba wan phah sumar ha ki.
Ha kaba iadei bad ka jingshah kren tohmet ki paidbah khamtam ha ki thain kyndong haka por ba ki leit phah sumar ha ki Hospital, CHC ne CHC, ka Kong Ampareen Lyngdoh kala pyntip ba shen ka tnat kan phah sha ki Training Center ia ki Doctor bad ki Nurse khnang ba kin ioh jinghikai ban nang bha ban pyniadei bad pyniajan bad ki paidbah kiba wan phah sumar.
Kala ong, ki Nongtrei ha ki jaka sumar kidei kiba hakhmat eh ki ban iadei bad ki paidbah bad dei namar kane donkam iaki Doctor bad Nurse ban nang kumno ban iadei bad ki paidbah khamtam ha ka rukom kren bad ban pyniajan bad ki.
Ka Myntri kala ong, “Teng teng ki jyrwit jyrwat ki mih, hynrei ka long pat kaba kongsan ia ki nongtrei haki jaka sumar khamtam ki Doctor bad ki Nurse ban nang ban pyniajan bad ki paidbah. Ki nongtrei ki jaka sumar kidei ban nang kumno ban long kiba jemnud, kiba kloi ban iarap bad kiba sngewthuh iaka jingeh ki paidbah. Namar kane donkam iaki Doctor bad ki Nurse ban leit shah hikai lyngba ki ‘Short Term Program’ ban pyntbit shuh shuh ha ka phang Soft Skills”.
Kala ong ba ki paidbah ki wan sha ki jaka sumar namar ki donkam ia ki lad jingiarap bad dei namar kane, ka long kaba donkam ba ki Nongtrei ha ki jaka sumar kin long kiba sngewthuh bha bad kiba kloi ruh ban sngap ia ki jingeh ki paidbah kiba wan shah sumar.
