Imphal, Naitung 22: Ka Northeast Frontier (NF) Railway kan pynlong ia ka jingiamir jingmut ba ka Indian Institute of Technology (IIT), Guwahati, Manipur University lem bad kiwei pat ki tnat jong ki riew shemphang khnang ban lah ban shim ia ki lad jingiada ki ban khanglad ia ki jingjia twa khyndew hadien habud.
Ka NF Railway kala shim ia ka rai ban shim ia ki jingai jingmut jong ki riew shemphang hadien ba ka la sakhi ia kane ka jingjia twa khyndew ba shyrkhei ha Manipur ka ba la shim ia ka jingim jong ki 56 ngut ki briew.
U heh ka tnat NF Railway u la ong ba ki enjiniar kin shim ia ki jingai jingmut jong ki riew shemphang ha ka ba iadei bad ka jingpyntrei ia ki projek lynti rel ha ki jaka ba long lum bad ha ki jaka ba jur ki jingtwa khyndew hapoh Manipur khnang ba kum kine ki jingjia kin ym jia shuh hadien habud.
Ia ka jingwad ka ba lai taiew kynthih la pynlong hadien ka jingtwa khyndew ba shyrkhei ha ka jaka ba pyntrei ia ka projek lynti rel ha Noney district ka Manipur ka ba la jia naduh ka 29-30 tarik u bnai Jylliew ba la dep ia ka ba la pynkut noh ha kane ka sngi Balang ba la lah.
Utei u heh ka tnat NF Railway u la ong ruh ba tad haduh ba kin lah ban ai da ka kam ka ba neh sha ki ba haiing hasem jong kitei ki nongtrei bylla ba la khlad noh, na ka liang ka tnat Railway kan pynthikna na ka bynta ka kam kontrak hapoh kawei na ki tnat treikam jong ka hajan katei ka jaka ba la jia ka jingtwa khyndew ha Noney bad ha Kangpokpi district.
Ki laingut ki khynnah ki ba la kylla khunswet namar ka jingkhlad noh ki kmie ki kpa ha katei ka jingjia twa khyndew kin ioh ia baroh ki lad jingiarap, kata naduh ka pule puthi bad kiwei pat ki jingpynlut pynsep ha ka ba yn thep ruh ia ka pisa jingiarap sha ki bank account ki jong ki khnang ba kin lah ban bteng ia ka jingpule jong ki tad haduh ba kin da pyndep ia ka graduation khlem ka jingshah pynthut.
Kine ki khynnah mynta kin shong kin sah hapoh ka residential school ka ba don ha Rengpang.
Kat haduh kane ka sngi Nyngkong ba la lah, 56 tylli ki met iap ki ba bun na ki, ki shipai Territorial Army la ioh ban sei na katei ka jaka ba la jia ka jingtwa khyndew ha Tupol hapoh Noney district ka Manipur, katba san ngut ki briew, uwei u dkhot ka tnat shipai TA, lai ki nongshong shnong bad uwei u voluntter ki dang jah rngai haduh mynta.
