Shillong, Iaiong 28: Ka Expert Committee halor ka State Reservation Policy, Meghalaya kala shong ia ka jingialang ka jongka hynne ka Sngi Saitjain bad kala shim ia ka rai ban ai iaka jingpynbna paidbah na ka bynta ban shim ia ki jingmut bad ki jingpynsngew na ki kynhun bapher bapher bad ban pynlong ruh iaka jingsngap ia ka sur u paidbah ne Public Hearing.
Kane ka Committee hapoh ka jingialam jong u Chairmanship Justice (Retd.) Mool Chand Garg ryngkat bad ki dkhot kiba kynthup ia u Justice (Retd.) Dr. Satish Chandra, u Prof. D.V. Kumar, u Prof. Chander Shekhar bad u Prof. Subhadip Mukherjee kila shong jingialang hapoh ka nongbah Shillong.
Ha katei ka jingialang la wan ban iashimbynta lang da ki heh ophisar na ka tnad Personnel jong ka sorkar jylla.
Ka Committee kala shim ia ka rai ba shen kan pynmih ia ka jingpynbna paidbah ne Public Notice na ka bynta ban iasyllok, ban shim ia ki jingpynsngew bad ki jingpynpaw ha kaba iadei bad State Reservation Policy.
Nalor kane, la shim ruh ia ka rai ban pynlong ia ka jingsngap ia ka sur u paidbah ne Public Hearing ha nongbah Shillong bad ha baroh ki District Headquarter ne kino kino ki jaka katkum ka jingrai ka Committee hadien ba kala ioh pdiang ia kino kino ki jingpynsngew ne jingai jingmut na baroh kiba don bynta.
Ka Committee kan iakynduh biang ha u Bnai Jymmang 2024.
