Shillong, Lber 22: Ka Mynken Christian Higher Secondary School kaba na Ri Bhoi District kala pynkhreh ban leit mihkhmat ia ka ri India ha ka jingiakhun ha ka Indo-French Football Tournament ha ka sien ka baar kaban long ha Paris, France.
Kane ka kynhun ialehkai ryngkat bad u Coach bad ki Staff, kin mih na ka Shillong ha ka sngi u Blei ban leit iashimbynta ha katei ka lympung iakob ialehkai kaban sdang naduh ka 25 tarik u Lber.
Ia ka ri India yn mihkhmat da artylli ki kynhun kiba kynthup ia ka Mynken Christian bad ka TG English School na Manipur kaba la long ka lahduh ha ka Subroto Mukherjee 2024.
Ka sorkar Meghalaya kala pynlong ia ka jingialang hynne ka sngi Saitjain, ban kitbok kitrwiang ia katei ka kynhun shwa ba kan mih noh na ka Nongbah Shillong, ia kaba la wan ban iashimbynta da ki nongialam jong ka Meghalaya Football Association (MFA) ki heh ophisar jong ka Directorate of Sports and Youth Affairs.
Ia baroh ki jinglut jingsep jong katei ka kynhun ialehkai kaban leit ialehkai sha France yn pynlut da ka sorkar jylla.
U President ka MFA u Bah Hamletson Dohling ula aiti ruh ia ka song pisa kaba T.1 Lak kum ka jingkyrshan ia katei ka skul.
