Shillong, Rymphang 05: U Myntri ka tnat Tourism Bah Paul Lyngdoh hynne ka sngi u la ong ba ka Sorkar Jylla kan ai ia ka jingkyrshan kaba pura ban lah pyniaid beit iaid ryntih ia ka Concert u Ed Sheeran ka ban long haka 12 tarik mynta u bnai ha Madan Polo.
“Ngan lum ia ka jingialang jong ka High Level Meeting haka 6 tarik mynta u bnai. U nongpyniaid ia ka Book My Show un wan shane ha kine ki 3-4 sngi ban pynthikna ba baroh ki jingdonkam ki biang lut nadong sha dong. Ka Sorkar kan pynthikna ban ai jingkyrshan ha kaba iadei bad ka jingdonkam pulit, bor pahara, ki jaka sumar, ka rukom pyniaid kali bad kiwei kiwei ki jingdonkam” ong u Bah Paul.
Haba kylli, u Bah Paul u la ong “Ngi don ka Turf Protector ban iada iaka madan bad kiwei ki kor teknoloji thymmai kiba la pyndonkam ha kylleng ka pyrthei “.
