Guwahati, Rymphang 10: Ka Kaziranga National Park ha Assam kala pynkhreh ban ailad ia ki nongjngohkai ban leit jngoh iaka kolshor kaba riewspah jong ka Assam ha ka jingpynmih ia u Slasha.
Kane ka National Park, kaba dei ka jaka sah jong ki Kyndad kiba don tang kawei ka reng ne ki One-Horned Rhino ha ka pyrthei, yn ailad ia ki nongjngohkai ba kin leitkai bad ban peit da la ki jong ki khmat ia ka karkhana pynmih Slasha ban sakhi kumno ka CTC, Assam ka pynmih ia u Slasha uba la rep khlem kano kano ka jingpyndonkam ia ka daw bad kumno la pynkhreh bad pynheh pynsan ia une u Slasha.
Nalor kane ki nongjngohkai kin ioh ruh ban mad ia ka sha hapdeng jong ka jingphalang jong katei ka khlaw kaba jyrngam.
Ka Kaziranga National Park kadei ka jaka kaba khring tam ia ki nongjngohkai ha ka thain shatei lammihngi bad mynta kala sdang ia ka sienjam kaba thymmai ban khring shuh shuh ia ki nongjngohkai hadien ba ka kam jngohkai kala shah ktah jur ha kylleng ka pyrthei na ka jingwan saphriang ka khlam COVID-19.
Ka jingwan tuid ki nongjngohkai ha kane ka Park kala kiew na ka 2.55 lak ha u snem 2022 sha ka 3.26 lak ha u snem 2023 bad palat 1.79 lak ki nongjngohkai kila dep ban wankai ha kane ka National Park bad ia ka Tiger Reserve naduh u bnai Risaw.
