Agartala, K’lyngkot 15 :Ha kawei pat ka jingkylli ha kaba iadei bad ki kam sain hima sima shwa ka ilekshon assembly ha Tripura, ka seng Indigenous People’s Front of Tripura (IPFT), kaba dei ka paralok synrop jong ka sorkar synshar BJP ka la shim ia ka rai ban pynkut noh ia ka jingiadei bad kane ka saffron party bad pyniasoh bad ka liang party liang pyrshah Tipra Motha ba la ialam da u Pradyot Bikram Manikya Deb Barma, uba dei ruh u khun syiem jong ka Tripura.
Ha ka 13 tarik mynta u bnai, u Pradyot Deb Barma u la iakynduh ia u nongialam ka IPFT u Aghore Debbarma ha Guwahati bad pynlong ka jingiamir jingmut halor ka jingtreilang ka ban sa urlong hapdeng kine ki artylli ki party ha ryngkat ka jingiadon lang kiwei pat ki nongmihkhmat na baroh ki ar party.Baroh kine ki ar party ki lah ban mih ryngkat lang da ka kyrteng bad ka shap kaba thymmai.
Utei u heh ka IPFT ula pynpaw lyngba ka lad pathai khubor da kaba ong; “Ngi la shim iak a rai ban pyniasoh bad ka Tipra Motha na ka bynta ban lah ban pynneh pynsah ia ki jaidbynriew trai shnong ka Tripura bad ki nongshong shnong ka jylla hi baroh kawei.Ynda ngi la wanphai na Guwahati, ngin iamir jingmut bad ki dkhot ka party jong ngi.Ka jingdawa ka jong ngi ka neh kumjuh kata ka jingtreikam jong ka sorkar da kaba pynshong nongrim katkum ka sixth schedule kaba hapoh ka Articles 2 bad 3 jong ka Constitution.Kane ka dei ka thong ka jong ngi, kane ka dei ka jingioh ka jong ngi.Kumta ruh ngi la wan ryngkat ha kane ka jingiohi bad ngin sa pynbna hadien ba ngi la iamir jingmut bad ki dkhot ka party,” ong u Aghore Debbarma.
Ka Tripura kan pynlong ia ka ilekshon assembly ha u bnai Rymphang lane ha u Lber u ban wan.Katba ka sorkar synshar BJP kan ialeh na ka bynta ban neh ha ka bor ha ka kylla kaba ar, hynrei kan ngat ha ka jingialeh kaba jur na ka CPI (M), Congress, TMC bad ka jingkiew jong ka party jong ki trai shnong riewlum ka Tipra Motha.
Ha u 2018, ha ryngkat ka IPFT ka BJP ka la lah ban pynkut noh ia ka jingsynshar kaba arphew snem jong ka sorkar CPI (M) ha ka jylla.Ha kane ka kynti kaba mynta ka IPFT ka la shim ia ka rai ban pyniasoh bad ka kynhun kaba ia pyrshah, katba ka partyh TMC jong ka Mamata Banerjee kala pyrshang ban ioh jaka ha kane ka jylla kata khamtam lyngba ki jaidbynriew Bengali.
“Ngi lah ban pdiang ia ka jingtyrwa jong u Pradyot Deb na ka bynta ka kyrteng bathymmai jong ka party kum ka TIPRA Motha IPFT, bad ngi la shim ia ka rai ban pyndonkam da ka shap jong ka IPFT kaba dei da ka wait ia kaba la dep lypa ban ithuh da ka election commission,” ong u Aghore Debbarma.
