Shillong, Rymphang 22: U Myntri Khynnah ka sorkar pdeng uba khmih ia ka External Affairs bad Textiles Pabitra Margherita ula ong ba yn sa shimkhia bad ka Ministry of Home Affairs (MHA) halor ki jingsaphriang ki khubor ba ka don ka jingpyrshang ban pynkhie im biang ia ki kynhun kieng atiar kiba don ha khappud jong ka ri India-Bangladesh.
Haba iakren bad ki nongthoh khubor, u Margherita ula ong, lada don shisha kum kitei ki jingtip, yn shimkhia ban iakren bad ka tnad kam pohiing ka ri.
“Ngi pynthikna ba ia ka jingshngain bad ka jingiada ka dei ban long kaba hakhmat eh ia ka Ri” ong u Margherita.
Ha kaba iadei bad ka jingdawa ban buh ia ka Passport Office ha Tura, West Garo Hills, u myntri khynnah ula ong, haduh mynta ka tnad kam shym la ioh pdiang ia kano kano ka jingkyrpad na ka sorkar jylla ha kaba iadei bad katei ka bynta”.
“Kumta lada ka don kano kano ka jingkyrpad na ka sorkar jylla, ngan shimkhia ban iakren bad ka tnad jong ka sorkar pdeng. Ka Ministry ka dang trei shitom ban pynpoi ia ka jingshakri ha kylelng sawdong ki jaka bad wat ha ki jaka kiba don ha kyndong tam ha kane ka Ri. Lada ka don shisha ka jingkyrpad na ka sorkar jylla ne kiba don bynta lang ha katei ka kam, ngin sa shong ban iatai bad ngi ngeit skhem ban don ia kaei kaei kaba kum kata hi” ula bynrap.
