Shillong, Risaw 25 : Ka North Eastern Hill University Students’ Union (NEHUSU) kan pynlong ia ka jingiaid paidbah kum ka dak ban pynpaw ia ka jingpyrshah lashai ka sngi Palei, ban dawa ia ki bor pyniaid ka University ba kan leh eiei noh halor ki jingdonkam bapher bapher jong ki samla pule.
U President ka NEHUSU samla First June Nongbsap ula ong ba ka Union kala kyrpad ia baroh ki samla pule bad ki seng kiba don hapoh ka Univeristy ba kin iasnohkti lang ha kane ka jingiakhih bad ban boycott ruh ia ka jingiashong klas.
La pyntip ba kane ka jingiaid paidbah kan sdang na Central Library sha Administrative Block.
Haba kren halor ki ishu, u samla First June ula ong “Halor ka kam hostel, ngi dawai ban pynjanai ha ka rukom ai ia ki jingbam ba bha, ban pynioh wifi bad kiwei ki jingdonkam na ka bynta ka jingshngain bad jingaram jong baroh ki nongsah hostel”.
Ula ong ba ka Unioh kala dawa ruh ban buh noh ia ka Library ba kyrpang na ka bynta ka School of Technology (SOT), ban long shai bad khuid ha ka jingai marking system ia ki samla pule bad kiwei kiwei.
Halor ka jingthungkam ia u Rohit Prasad, une u President ka NEHUSU ula ong “Ngi sngewkhia halor ka jingthung ia u Rohit Prasad sha ka Ophis jong u Vice Chancellor. Ka jingbym long shai ha ka rukom thungkam bad ki kyndon ban thungkam ia une u briew ka dei ka kam kaba ngi dawa ban tuklar mardor”.
