Shah khang tala ka kor tylliat maw namar ki nongbylla bar jylla
Nongstoin, Risaw 25 : Ka seng FKJGP bad ka Joint Action Committee (JAC) ki Dorbar Shnong ka thain War San Lyngdoh, kila aipor shibnai ia ka kom pani ba pyntrei ia ka surok Nongstoin-Wahkaji ba kan pynbiang noh ia ki kot ki sla jong ki nongbylla bar Jylla, khnang ba kan iaid sdang biang shaid shaid noh ia ka kam.
Kane kala mih hadien ba ka seng FKJGP-WKH kala leit ban khang tala ia ka kor tylliat maw jong kane ka kompani ha ka sngi thohdieng jong ka taiew bala lah, halor ka jingshem ba bun ki nongbylla bar Jylla kila wan trei bylla khlem kino kino ki kot ki sla khamtam ka Labour Licence.
Ka Joint Action Committee kala tuklar ia kane ka jingkhang tala ka FKJGP haduh ba kane ka seng kala hap khot ia ka jing ialang kaba long hynne ka sngi Balang, ban iakren pynbeit ia kane ka kam.
Ki Nongialam ka FKJGP kila kren shai hakhmat ka JAC ba ka jingkhang tala ia kane ka kor tylliat maw, kam dei satia ba ki kwah ban pynthut їa ka jingpyntrei їa katei ka surok lane ka jingpyrshah їa ki kam pynroi kumba la kynthoh da ki briew hynrei ka dei halor ki nongrim ka jingleh bym kheiñ snep jong ki nongpynїaid katei ka Kompeni їa ki trai muluk.
La pynshai ruh ba kawei pat ka daw ka dei namar kane ka kompani kam shym la pynbiang їa ki kot ki sla jong ki nongtrei.
Na ka liang ka JAC kala pynpaw ia ka jingeh halor ka sienjam bala shim da ka FKJGP-WKH namar ka jingthut noh ka jing pyntrei ia ka surok kaba kila angnud baroh shikatta.
Hadien ka jingїatai kaba la neh slem bha, baroh arliang ki la poi sha ka jingїasngewthuh jingmut ban aipor shibnai ia ki nongpyniaid jong kane ka kompani b aka dei ban pynbiang lut ia baroh ki jingdonkam kiba donkam khnang ba kan ym mih shuh kano kano ka jingpynthut ia ka project.
Halor katei ka rai, u bah Zandy Myrthong secretary ka Joint Action Committee, u la kubur ba ka JAC ka sngewїahap їa ka jingai por jong ka FKJGP їa ki nongpynїaid jong ka Kompeni ba ki dei ban pynbiang їa baroh ki jingdonkam ha poh ka por ba la buh, khnang ba kan ym pynthut їa ka jingtrei bad ba ka Kompeni ka pyndep noh kham kloi їa katei ka surok.
