Palat 5.14 lak ki Longiing bala ioh kor um Iing ha Jylla
Shillong, Jylliew 24 : U Myntri ka Tnad Public Health Engineeriong (PHE) Marcuise N Marak, ula rai ban leit jurip sha baroh 12 tylli ki District ka Jylla na ka bynta ban shong bishar kam haba iadei bad ka jingpyntreikam ia ka Jal Jeevan Mission (JJM).
“Namar mynta bala weng ia ka Model Code of Conduct (MCC), ngan sa shong bishar kam halor ka jingpyntreikam ia ka JJM hapoh ka Jylla. Ngan sa leit iuhkjat ha baroh ki District ka Jylla ban pynthikna ba ka Tnad PHE kala leh eiei halor ki jingujor kiba wan na u paidbah” ong u Marak.
Haba pynpaw ba ka JJM ka dei ka skhim ba dang iaid, u Myntri ula ong ba kin don beit katto katne ki jingduna hangne hangtai. “Kumta, haman ba don ki jingujor, ngin pyrshang ban khmih bad ban pynbeit ia ki” ula bynrap.
Kat kum ka jingong u Myntri, 80 percent ka kam kala dep bad palat 5.14 lak ki longiing kila ioh kor um iing ba mih um lyngba ka JJM ha Jylla Meghalaya.
