Shillong, Rymphang 06 : U Myntri ka tnad Bording Abu Taher Mondal ha ka sngi Ba-ar, ula ong ba ia ka tarik ban rah shajrong ia ka jingkieng Umiam yn sa pynbeit noh shen.
“Ha ka sngi ba rah ia ka jingkieng, ngin khang dam shisyndon bad pynthikna ba yn ym shah ia ki kali ba ki iaid lyngba ka jingkieng la kumno kumno ruh naduh 4 haduh phra kynta eiei” ong u Mondal haba iakren bad ki nongthoh khubor.
U Myntri u pyntip ba ka Tnad kan sa shong jingialang bad ka Coordination Committee ba kynthup ia ka MeECL, PWD, Transport bad ki bor District ka East Khasi Hills bad Ri-Bhoi nalor ki Pulit, ban shim rai ia kane ka kam.
“Hadien ka jingialang, ngin sa buh ia ka tarik ba thikna lano ba ngin rah ia ka jingkieng ban ioh bujli ia ki bearing” ula ong haba kyntu ia ki nongniah kali ba kin iaid na kiwei pat ki surok kiba don, ba kin poi sha ki jaka ba ki thmu ban leit.
U Myntri ula pyntip ba ka jingmaramot ia ka dam kan dang shimpor sa 3-4 bnai eiei ban pyndep.
Haba kylli, u Mondal ula ong “Ia mynta, ym shah tang ia ki kali heh ban iaid na ka jingkieng hynrei ha ka sngi ba rah ia ka jingkieng, 4 haduh 8 kynta ngin ym shah iaid iano iano ruh. Hadien bala pynhiar pat ia ka ha ka jaka ba dei, ngin sa shah ia ki kali rit ba kin iaid biang kata kiba khia ym palat ia ka 4 MT”.
