Guwahati, Naiwieng 03 :U Myntri Rangbahduh (PM) Narendra Modi shen un pynlong ka jingwan jurip shapoh Assam ban buh ia u mawnongrim na ka bynta ka jingtei ia ka jingkieng thymmai halor jong ka wah Brahmaputra hajan ka sorbah Guwahati.
Ia mynta hi ki don artylli ki jingkieng halor jong kane ka wah ba pawnam ha ka sorbah Guwahati, katei ka jingkieng Saraighat bala rim bad ka jingkieng Saraighat bathymmai kaba marpyrshah.Sa kawei pat ka jingkieng la sdang ban pyntrei halor jong kane ka wah da ka jingthmu ban pyndep noh hajan kaba kut jong une u snem u ban wan. Kane ka jingkieng kan pyniasoh ia ka thain Mazgaon bad ka thain shatei ka Guwahati sha ka thain Bharalumukh – Machkhua ka Guwahati.
Ia kane la pynbna da u Myntri Rangbah (CM) ka Assam u Himanta Biswa Sarma hynnin ka sngi Balang.U Sarma ula ong ba u PM Modi shen un wan jngoh sha kane ka jylla sa shisien pat.Kawei na ki mat kaba kongsan jong ka jingwan jngoh ka long na ka bynta ban buh ia u mawnongrim na ka bynta ka jingkieng kaba thymmai halor jong ka wah Brahmaputa.Kane ka jingkieng thymmai kan pyniasoh ia ka sor rit jong ka Sualkuchi ia kaba la tip bha kum ka Assam Silk sha Palasbari.
Kane ka projek kaba thymmai kan pynkloi ia ka leit ka wan hapdeng kitei ki artylli ki thain.Ia mynta hi ka leit ka wan hapdeng kine ki artylli ki thain ka shimpor haduh kumba palat ar kynta namar ym don da kiwei pat ki lad lyngba ki lynti surok.Mar ia pyndep ia kane ka projek, ki nongshong shnong na Barpeta bad Nalbari district kin lah ruh ban poi shapoh ka kad liengsuin LGBI Airport ha Guwahati ha ka por kaba tang khyndiat eh. Nalor kata kan pynsuk ruh ha kaba iadei bad ka leit ka wan jong ki paidbah bad ka jingpynpoi ia ki mar ki mata hapdeng ka Kamrup, Kamrup Metro, Barpeta, Nalbari, Goalpara bad Baksa district ka jylla.
Ka jingpynlut na ka bynta kane ka projek kaba radbah kan kot sha kumba T. 4000 klur. Ia kane ka projek la dep ruh ban mynjur da ka tnat pla tyngka hapoh ka jingkhmih jong ka Myntri pla tyngka jong ka ri, ka Nirmala Sitharaman.Ka jingjrong jong kane ka jingkieng kan long kumba 4.08 kilomitar na shiliang sha shiliang.
