Shillong, Nailur 13: U Myntri Rangbah ka Jylla Conrad Kongkal Sangma hynne ka sngi ba-ar, ula ong ba ka Sorkar Jylla kala tyrwa ban buh noh da ka song pisa ha ki Deputy Commissioner ba kin ai ia ki jingiarap ba kyrkieh sha ki Longiing kiba shah lynshop ha ki bor ka mariang.
Haba jubab bynrap, u Conrad ula pyntip ba ia kane ka kam ba iadei bad ka jinglynshop ki bor mariang la iatai ruh ha ka jingialang ba dang shen bad ki Deputy Commissioner jong ka Jylla.
“Ha ka jingialang, ngi la shim ia ka rai ba nalor ka T. 25 lak kum ka song jingiarap ia baroh, ka donkam ruh ban don ia ka song pisa ban buh ha ki DC haba iadei bad ki Iing kiba shah pynjulor namar ki briew kin ym lah ban ap slem ia ka jingpyniaid kam” ula ong.
“Namar kata, ia kane ka kam ngi la mynjur bad ngi dang pyrkhat mynta ba kumno ngin pyniaid ia ka kam khnang ba ngin lah ban buh noh ia ka song pisa ha ki DC” ula bynrap,
Kat kum ka jingong jong u, kam iahap satia ba ki briew kin hap ap haduh 2-4 snem ban ioh ia ka song jingiarap na ka bynta ki Iing ba shah pynjulor.
Shuwa kane, u Myntri ba khmih ia ka Tnad Revenue & Disaster Management ma Kyrmen Shylla ula pyntip ba haduh 187 tylli ki Longiing kila shah ktah na ka jingpynjulor jong ka bor mariang ha u bnai Iaiong mynta u snem tang ha Bhoirymbong Block.
Ka jingduhnong baroh kala kot haduh T. 13.94 lak ha kaba T. 8.79 lak lah dep ban pyllait bad T. 5.15 lak la dei ban pyllait noh sha kine ki Longiing” ula ong.
Haba u MLA ka Umroi Bah George B Lyngdoh ula pan jingtip ba lano yn pyllait ia ka pisa ba dang sah, u ma Kyrmen ula ong “Ngi dang ap ban pynlong ia ka jingialang ban pyllait noh ia ka pisa ba dang sah kaba long T. 5.15 lak”.
Ha kawei ka liang, u MLA ka Mawsynram bah Himalaya Shangpliang ula pynpaw ia ka jingsngewkhia halor ka jingslem ba pyllait ia ka song jingiarap sha ki briew kiba shah ktah ha ka jingwan lynshop ki bor mariang. Ula ong ba u BDO ka Mawsynram ula dep phah ia palat 200 tylli ki kyrteng sha ka Disaster Management hynrei haduh mynta kim pat ioh satia ia ka pisa.
“Nga kyrpad ia u Myntri ban khmih lem ia kane ka kam bad ban pynthikna ba ka pisa bala phah sha ki District ba kin pyllait noh sha ki Block namar ki paidbah kila ap khmih lynti ban ioh jingiarap. U Myntri Rangbah u ju iai ong ba yn leh kloi kat kaba lah hynrei lada kumne ka jia ka mut ba ki paidbah ki shah shukor” ula ong.
Haba jubab, u ma Kyrmen ula ong ba ka Tnad Disaster Management kala dep ban pyllait ia ka song jingiarap ba kot T. 1.36 klur tang ia ka East Khasi Hills marwei. “Bad haduh mynta T. 50.20 klur la lah ban pyllait sha ki Deputy Commissioner ban ai jingiarap ia kito ki longiing ba shah ktah na ka jingwan lynshop ka bor mariang” ula pyntip.
