Shillong, Risaw 20 : U Nongialam ka BJP bad MLA ka Pynthorumkhrah Bah AL Hek ha ka sngi Ba-ar ula ong ba ka rai jong ki lai ngut ki MLA basah ka UDP ban iasoh sha ka NPP ka dei kaba la antad lypa la katto katne por.
Ki lai ngut ki MLA ka UDP-Paul Lyngdoh, Renikton Lyngdoh Tongkhar bad Nujorki Sungoh – kila iasoh sha ka NPP hadien ka jingiakynduh bad u Lamphang, kaba la jia ruh tang da ki taiew hadien ba 8 ngut ki MLA ka UDP kila iasoh sha ka BJP.
“Nga la iohi ha ki khubor ba lai ngut ki MLA ka UDP kila iakynduh ia u Lamphang bad iasoh sha ka NPP. Kane ka dei kaba la iatip naduh kaba sdang hi” ong u Bah Hek haba iakren bad ki nongthoh khubor.
Ula ong “Lait na u Bah Nujorki Sungoh ba na ri-lum Jaintia, ngim shym la tip eiei shaphang kane ka sienjam jong u, hynrei kiwei ki dei ruh ki paralok jong nga. Ngi tip ba kin sa iasoh sha ka NPP. Ka jingthmu jong ki ka long kaba shai na ki kam ba kila pynbeit ha la ki constituency. Kam dei shuh kaba sngew pher”.
Haba pynpaw ba ka kynhun synrop MDA kam shym la shah ktah eiei, u bah Hek ula ong “Ngi dang don ha ka MDA. Kito kiba iasoh NPP hynnin ka sngi ki dei ki paralok ha ka MDA hi bad kito kiba iasoh BJP na ka UDP ki dei ki paralok ha ka MDA. Kam don jingpher eiei ia ka MDA”.
