Shillong, Risaw 20: Ka ding kaba klang ka la bam duh ia kawei ka Canteen kaba don hapoh ka skulbah North-Eastern Hill University (NEHU) ha ka step sngi Ba-ar, bad wanrah ia ka jingjulor kaba khraw ia kawei ka shopping complex ba don marjan ka Gate No. 3. Hynrei ym shym la don mano mano ruh ba mynsaw ha kane ka jingjia.
Katei ka jingpluh ding, ka la jia ha ka por 11 baje mynstep, ha ka canteen, kaba don ha ka mala ba nyngkong jong katei ka complex.Katkum ka jingong jong u trai dukan, katei ka jaka ka dang plie ha katei ka por, bad ki nongtrei ki la pynkhreh ia ki jingbam thiang bad ki dang buh ia ki ha ka counter na ka bynta ban die baroh shisngi hynrei kila iohi kynsan kynsan ia ka jingpluh.
U trai u la ong ba ym shym la don kano kano ka jingshet jingshet ha ka por ba sdang ka ding bad suba suba ba ka dei ka jingbthei jong ka LPG cylinder.
Watla ka skulbah ne ka tnad pynlip ding kim shym la pynthikna thikna ia ka daw, hynrei ki nongsakhi bad ki nongtrei ha ki dukan ba marjan ki la iathuh ba ki la iohsngew ar tylli ki jingsawa kaba jam shwa ban iohi ia ka jingpluh ding.Ki la suba ba ki jingsawa ki dei na ka jingbthei jong ki tyndong LPG.
Ym shym la don ki nongthied hapoh katei ka jaka ha ka por ba ka ding ka la pluh. La iathuh ba ki nongtrei jong ki dukan ki la pyrshang ban pynlip ia ka ding da kaba pyndonkam da ki tiar pynlip ding, hynrei ki tiar kim shym la treikam.
Ka ding ba klang ka la bam duh syndon ïa ka dukan die marbam bad ka la pynjulor jur ïa ka jaka, khamtam eh ïa ka tnum jong ka, kaba bun na ki la shah pynjulor.La ngeit ba ki dieng ba la shna ha ki bynta jong ka tnum ka la pynlong ban pur stet ka ding.
Ha katei ka jaka don lai tylli ki restaurant, ka ATM, ka dukan stationery, ka dukan khap shniuh bad katto katne kiwei pat ki jaka khaii.
Ki pulit pynlip ding mar mar kila leit shakatei ka jaka bad ki la lah ban tehlakam ia ka jingpluh ding.Ka jingjulor jong ka dukan die marbam la antad ba ka long kumba 20 lak tyngka, katba ka jingduhnong baroh kawei ia ka complex bad kiwei kiwei ki jaka treikam ka dang sah ban khein.
Ka tnad pynlip ding ne ka NEHU kim shym la pynmih kano kano ka jingpynbna kaba shai halor kane ka jingjia ha ka por ba ai ia kane ka kaiphod. 
