Shillong Kyllalyngkot 20: Ka seng Jaintia Students Union, hynne ka sngi Saitjaiñ kala pynpaw iaka jingbym sngewiahap iaka jingrwai State Anthem ka jylla Meghalaya namar ka jingbym shim pynrung satia ia ka ktien Jaintia ha ka jingrwai.
“Ha ka jingshisha ka Sorkar kadei ban pynrung lang ia ka ktien Jaintia pynban ka sorkar kala pynrung da ka jingrwai ha ka ktien phareng bad kane ka pynsngewsih shibun ia ki paid ka thaiñ jong ka Ri Jaintia baroh kawei”pynpaw u General Secretary ka JSU u samla TR Suchen.
Ula ong ba ka sorkar ka dei ban tip ba ka jylla Meghalaya ha ka por ba kala ioh ia la ka jylla na ka Assam ha u snem 1972 ha ka 21 tarik u Kyllalyngkot, la shim na ar tylli ki distrik jong ka Assam kata kadei ka United Khasi and Jaintia Hills bad ka Garo Hills.
U nongialam ka JSU ula dawa na ka sorkar jylla ba kadei ban pynbeit thymmai ia kane ka State Anthem bad ula pynpaw iaka jingbynniaw ba ki MLA na ri Jaintia ki shu sngap jar jar ia kane ka jingrwai State Anthem kaba lah pynjah ia ka Jaintia na ka jingrwai ka jylla.
“Ka sorkar kadei ban pynrung khnang baroh lai tylli ki riewlum hapoh ka jylla ba kin ia pawlang ha kane ka Anthem bad ym dei ban pynrung da ka ktien nongwei (phareng)” la pynkut ka JSU.
