Shillong, Rymphang 09: Ka Sorkar Meghalaya Democratic Alliance (MDA) kala rai ban nym ai jingbit shuh ban shna iing ha ki jaka ba long padun/riat ba pynnoh haduh 50 degree.
Kane ka dei kawei na ki jingpynkylla bala wanrah ha ka Meghalaya Building Byelaws, 2021 bad bala mynjur da ka jingialang jong ka Kynhun Myntri bala pyniaid da u Myntri Rangbah ka Jylla Conrad K Sangma hynne ka sngi Thohdieng.
Haba iakren bad ki nongthoh khubor, u Conrad ula ong “Ngi la mynjur ia katto katne ki jingpynkylla ha ka Meghalaya Building Byelaws, 2021 ban lah pynneh kumjuh ia ka jingroi ka sor ha Meghalaya”.
“Ia kine ki jingpynkylla la leh kat kum ki kyndon bala buh da ka Sorkar India bad ruh ban pynthikna ia ka jingshngain jong ki jingtei kiba don nalor ban pynthikna ba ki briew ba don jaka bar it, kin lah ban pyndonkam kham bun ia ka jaka. Mynshuwa kala don ka jingpyrrkhing ia ka jingpyllait jaka na ki bynta ba shakri bad ki kynriang haba shna iing hynrei ia kane mynta la pynjynsur noh”.
U Myntri Rangbah u pyntip ba yn ym ai jingbit shuh ban shna iing ha ki jaka kiba long padun/riat ba pynnoh haduh 50 degree lane tam. “Ym lah ban tei iing ha kine ki jaka haba buh hakhmat ia ka jingshngain jong ka jingtei” ula ong haba bynrap ba ki jingtei kiba don ha ki jaka ba padun 40 degree bad palat ruh, kila don ki kyndon kiba hap bud haba phai sha ka jingjrong bad ka jingheh ka jaka ban pyndonkam.
U Conrad ula pyntip ba ki jingtei kiba palat 27 meter kin hap ban wan shim jingbit na ka Sorkar Jylla.
“Lada ki jingtei ki jrong palat 27 meter, kin hap ban wan sha ka Sorkar ban ai jingmynjur.Mynshuwa ka dei 40 meter hynrei mynta la pynduna sha ka 27 meter (jingjrong jong ka jingtei)” ula ong.
U Myntri Rangbah ula ong ba ka byelaws kala iarap bha ban tehlakam ia ka jingpynkhein ain ha ka jingtei iing.
 kala rai ban nym ai jingbit shuh ban shna iing ha ki jaka ba long padun/riat ba pynnoh haduh 50 degree.){kind=link}