Shillong, Jymmang 27: U Myntri Rangbah ka Jylla u Conrad K Sangma ha ka sngi Balang ula ong, ba ka Sorkar Jylla kan ym iaid lait ia kano kano ka kyndon treikam na ka bynta ki projek jong ki karkhana, haba pynshai halor ki jingkynthoh kiba dang shen halor ka jingpynsangeh ia ka Public Hearing jong ka Shree Cement hapdeng ka jingpyrshah jur jong ki paidbah ka thain.
“Ia man la ki projek, la batai lyngba ki kyndon treikam bad kano kano ka projek jong ki karkhana kadei kaba la shai lyngba ki kyndon treikam kiba la pyrkhing” ong u Conrad Sangma haba iakren bad ki nongthoh khubor.
“Ia ka sorkar, kam long kaba lah satia ia ngi, ba ngin nym bud ia kano kano ka kyndon treikam kaba la pyrkhing khamtam eh ha kaba iadei bad ki projek kiba heh” ula ong.
Haba kyntait halor ki jingkynnoh ba kala don ka jingpynjem ia ki kyndon pyrkhing, ula ong, “Kumta, kum kitei ki jingkynnoh kim long satia kiba dei, namar ba ngi lah bud ryntih ia ki kyndon treikam bad lada ka don kano kano ka bynta bad ka jingsngewkhia jong ki paitbah, kidei ban mih shakhmat hynrei ngi hap pat ban bud ia ki kyndon treikam. Ngi lah long kiba shai kdar bha halor kane”.
“Sngewbha ban kynmaw ba kam don kano kano ka jingkylli ban leh da ka bor hangne, kam don kano kano ka jingkylli ban pynkhein ne pynkdor ia ki kyndon ain hangne” ula bynrap.
U Sangma ula ong, ba ka rekod jong ka sorkar ha ka jingiaid lynti ha kine ki 8 snem ka pyni ia ka jingbud ryntih ia ki kyndon. “Ngi lah leh ia bun tylli ki projek ha kine ki 8 snem kiba la dep. Ka sorkar kam don ia kano kano ka jingthmu ban pynkhein ia ki ain na ka bynta kano kano ka kompani ne ka kynhun, baroh ki ain bad ki kyndon treikam kin dei kiba la bud ryntih na ka bynta baroh ki jait projek” ula ong.
Ula banjur ba kano kano ka jingkynshew tyngka kaba heh kam lah ban lait satia na kino kino ki jingbud ryntih ia ki kyndon treikam. “Ka mat hi ka long ba ia ngi, ki kyndon treikam bad ki ain bad kino kino ki jingdonkam katkum ki kyndon jingbthah kiba la don, la kadei ia kano kano ka kompani ruh kiba wan, ngi lah long kiba shai kdar ba ngi hap ban bud ryntih ia ki kyndon ain. Nga long shai kdar halor kane bad kumta ki bor pyniaid ruh kilal ong kiba shai kdar halor kane” ula ong.
“Kine kim dei ki dukan ki barit kaba phi pyrshang ban plie, kidei ki jingkynshew tyngka kiba heh kiba da ki hajar klur tyngka” la bynrap u Sangma.
“Ia kine yn ym lah ban shu iaid lait tang namar ba don mano mano kiba kwah ban iaid ne leh beit. Yn hap ban leh tang lada iaid ha ka nongrim jong ki kyndon treikam bad kumta ia ki kyndon treikam yn hap ban bud ryntih beit, ngi lah long kiba shai kdar bad dei beit ban bud ryntih ia ki kyndon treikam baroh”.
